Qaysı kásip haqqında sóz etkenimizde de onıń qánigesi bolıp jetilisiwde, álbette, ustazı bolıw talap etiledi. Ásirese, bilimlendiriw baǵdarınıń búgini hám keleshegi ustazsız rawajlanbaydı.
Ilim – misli bir túpsiz teńiz. Hár kim óziniń nesibesine jarasa bilim aladı. Mektepe oqıp júrip aq qaraqalpaq tili hám ádebiyatına qızıqqanman. Tilimizdiń bay imkaniyatların ustazlarımız jalıqpastan úyretken. Házirde universitet studenti sıpatında ana tilimizdiń keńligi hám tákrarlanbas sırların meńrerip atırmız. Mektep partasında-aq A.Dáwletovtıń avtorlıǵındaǵı «Qaraqalpaq tili» sabaqlıqları arqalı tilimizdi úyrengen bolsam, studentlik dáwirde ustaz tárbiyalaǵan shárkirtleri arqalı ilim sırların úyrenip atırımız.
Bıyıl Ózbekstan Respublikası Ilimler Akademiyasınıń akademigi, Qaraqalpaqstan Respublikasına xızmet kórsetken ilim ǵayratkeri, filologiya ilimleriniń doktorı, professor Abatbay Dáwletovtıń tuwılǵanına 80 jıl toladı. Usı sáne múnesibeti menen ustaz haqqında keńirek biliw maqsetinde málimleme resurs orayında boldım. Alım tárepinen biz, jaslarǵa kaldırılǵan miyrası – kitapları menen tanıstım. «Házirgi qaraqalpaq tili. Fonetika» sabaqlıǵı joqarı oqıw orınları studentler ushın jazılǵan bolıp, bul sabaqlıq «Házirgi qaraqalpaq tiliniń fonetikası» degen at penen 2012-jılı besinshi mártebe shıǵıptı.
Besinshi! Bes mártebe qayta basılıw hám jańa ózgerisler menen tolıqtırılǵan kitaptıń oqıwshısı ekenmen. Mennen aldın qansha shákirtleri oqıp tálim alǵan bul sabaqlıq arqalı qaraqalpaq tiliniń fonetikası máseleleri boyınsha kóp jańalıqlardı bilip aldım. Til iliminde qaraqalpaq tiliniń onı óz aldına. Sonlıqtan da ana tilimizdi úyrenip hám ilimiy jaqtan jetistirgen ilimpazǵa húrmetimiz bálent. A.Dáwetovtıń «Qaraqalpaq til biliminiń tariyxı» (2001-jıl), «Qaraqalpaq til bilimi, bibliografiyalıq kórsetkish» (2008) degen qollanbaları joqarı oqıw ornı studentlerine arnap jazılǵan. Mektep, qásip-óner kollejleri, akademiyalıq liceylerge hám oqıw ózbek tilinde alıp barılatuǵın kollejlerge arnalǵan sabaqlıqları 2002-jılı baspadan shıqtı. Ilimpazdıń tili bilimi baǵdarındaǵı jáne bir úlken jetiskenligi sonda, latın jazıwına tiykarlanǵan qaraqalpaq alipbesin dúziw hám onı jetilistiriwge belsendi qatnastı.
Ustaz hám alım, akademik Abatbay Dáwletovtıń qaraqalpaq tili bilimine arnalǵan miynetlerin kózden keshirip kewlimnen keshken pikirlerimdi qaǵazǵa kóshirdim. Al, qálbimde bolsa ustazǵa bolǵan húrmet húkim súrer edi.

Aygúl Abdireymova,
Qaraqalpaq filologiyası hám jurnalistika fakulteti
Baspa isi qanigeliginiń 2-kurs studenti