Bárshemizge belgili bolǵanınday, 12-oktyabr dunya júzi mámleketlerinde Amerika kontitentiniń ashılǵan kúni sıpatında belgilenip kelinbekte. Mine sol qatarı bul sáne bizdiń de názerimizden shette qalmadı. Nókis qalalıq XBB ne qaraslı 22-sanlı qániygelestirilgen ulıwma orta bilim beriw mektebinde Berdaq atındaǵı Qaraqalpaq mámleketlik universitetiniń Geografiya hám tábiyiy resurslar fakulteti geografiya tálim baǵdarınıń 4AD-kurs toparı studentleri hám mektep jámááti menen birgelikte «Jańa dúnyaǵa jańa qádem» atlı geografiyalıq keshe shólkemlestirildi. Keshege universitetimizdiń Geografiya fakulteti professor-oqıtıwshıları docent G.Xodjaeva, G.Bekpolatova, fakultettiń oqıw isleri boyınsha dekan orınbasarı A.Joldasov, úlken oqıtıwshıları M.Tursinov, G.Naurızbaeva, assistent Q.Daljanov hám B.Alievalar, 22-sanlı ulıwma orta bilim beriw mektebiniń direktorı Sh.Embergenova hám geografiya páni boyınsha metodikalıq birlespe baslıǵı Ataniyazova Qalligúl, pán oqıtıwshıları hám mektep oqıwshıları qatnastı.
Kesheni mektep direktorı Sh.Embergenova ashıp berdi hám kesheni shólkemlestiriwshilerge óz alǵısların ayttı. Sońınan fakultet dekanınıń oqıw isleri boyınsha orınbasarı A.Joldasov shıǵıp sóylep, keshede Amerika kontinentiniń ashılǵan sánesiniń belgileniwiniń maqset hám wazıypaları haqqında keshe qatnasıwshılarına túsinik berip ótti.
Geografiyalıq keshe geografiya tálim baǵdarı 4A-kurs studenti Kurbanazarov Baxtıbektiń Amerika kontitentiniń ashılıwınıń sebepshi insan – Xristafor Kolumbqa arnalǵan bayanatı menen baslandı.
Keshe dawamında student jaslar tárepinen tayarlanǵan bir neshe geografiyalıq oyınlar, tańlawlar hám kewil kóteriwshi koncert baǵdarlamaları tamashagóylerge inam etildi. Atap aytqanda, Bazarbaev Sultanbek tárepinen tayarlanǵan 10D,G-klaslar arasında «Kim tapqır, kim epshil – Kartadan obiektti tap», Sultamuratov Tóremurat tárepinen 10A,B-klaslar arasında «Xristafor Kolumb krasswordta», Atabaev Arıslanbek tárepinen tayarlanǵan «Pochta» oyınları, Smaylov Tórexan tárepinen «Jas Kolumb» súwretler jarısı ótkerildi. Sonday-aq, tamashagóyler ushın geografiyalıq oyınlar arasınan «Amerikanıń Qaraqalpaqlar tárepinen ashılıwı» atlı saxnalıq kórinis, milliy ayaq-oyınlar orın aldı.
Sonday-aq, keshede usı mektepte praktika ótip atırǵan student jaslarda sınaqtan ótkerildi. Mekteptiń geografiya páni boyınsha metodikalıq birlespe baslıǵı Ataniyazova Qalligúl student jaslardıń bilimin sınaqtan ótkeriw ushın «Topografiyalıq diktant» jarısın ótkerildi.
Barlıq ótkerilgen jarıslarda jeńimpaz bolǵan mektep oqıwshıları ámeliyatshı studentler tárepinen bahalı sawǵalar hám “Húrmet jaqlıq”ları menen sıylıqlandı. Keshe qatnasqan barlıq qatnasıwshılarda úlken tásir qaldırdı hám oqıwshı jaslarda «Jańa dúnyaǵa jańa qádem» taslaw ushın ájayıp kónlikpeler payda boldı degen úmittemiz.
Ekonomikalıq hám sociallıq geografiya kafedrası docenti G.A.Xodjaeva
4A-kurs geografiya tálim baǵdarı studenti B.Kurbanazarov
