Usı jıldıń 31-oktyabr kúni Berdaq atındaǵı Qaraqalpaq mámleketlik universitetinde «Jawızlıqqa qarsı – aǵartıwshılıq» atamasında úgit-násiyat ilajı bolıp ótti. Onda Ózbekstan Respublikası Ministrler Kabineti janındaǵı Din isleri komitetiniń I dárejeli qánigesi Sh.Manapov, Din isleri boyınsha komitetiniń Qaraqalpaqstan Respublikası aymaqlıq basqarmasınıń qánigeleri B.Ayımbetov hám X.Nızamatov, Qaraqalpaqstan Respublikası Qazıyatınıń qazı járdemshisi T.Dosımbetova, Respublikalıq ruwxıylıq hám aǵartıwshılıq orayı “Marifat” úgit-násiyatshılar jámiyeti aǵzası Sh.Ayapov, Nókis qalası Muxammed Baqıy iyshan meshiti imamı Sh.Qudaybergenov, Milliy ideya ruwxıylıq tiykarları hám huqıq tálimi» kafedrası baslıǵı A.Bayrıeva universitetimizdiń profilaktika inspektorı R.Tasbaeva hám student-jaslar qatnastı. Ilajdı universitetimizdiń Jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov basqarıp bardı.
Dáslep, ilaj qatnasıwshılarına taraw qánigeleri tárepinen tayarlanǵan arnawlı videorolikler qoyıp berilip, bul boyınsha jıynalǵanlardıń pikir usınısları tıńlandı. Bunnan soń ilajda sózge shıqqanlar mámleketimizde alıp barılıp atırılǵan keń kólemli jańalanıwlar, jaslarǵa berilip atırılǵan imkaniyatlar jaslardı hár tárepleme qollap-quwatlaw, olardıń óz kásibiniń jetik qániygesi bolıp jetilisiwi ushın barlıq shárt-shárayatlar jaratılıp berilgenin aytıp ótti. Sonday-aq, búgingi jedel pátler menen rawajlanıp baratırǵan globallasıw dáwirinde keleshegimiz bolǵan jaslardıń tálim-tárbiyasına ayrıqsha itibar qaratıw, olardı ruwxıy jaqtan jetik hám kámil insan etip tárbiyalawda bárshemiz teńdey juwapker ekenligin ayrıqsha atap ótti. Sonıń menen bir qatarda, keleshek áwladtı kámil insan qılıp tárbiyalawda, ásirese, jámiyettiń tiykarǵı jetekshi kúshleri esaplanǵan jaslardı joqarı intellektwal qábiletli, dúnyada hám mámleketimizde júz berip atırǵan siyasiy-ekonomikalıq ózgerislerge sanalı qatnas jasay alatuǵın mánawiy dúnyası bay, jetik qánigeler etip tayarlaw, olardı hár qıylı diniy ekstremestik, terroristik hám separatisitik idealardan qorǵaw, bunıń ushın student-jaslar ustazlarınan alǵan bilim hám tájiriybelerin watanımızdıń rawajlanıwı, elimiz tınıshlıǵı, xalqımız párawanlıǵı jolında xızmet qılıw kerekligin aytıp ótti. Iláj dawamında student-jaslar tiyisli taraw qánigelerinen ózlerin qızıqtırǵan sorawlarına juwaplar aldı hám ózleriniń pikir usınısların bildirdi.
QMU baspasóz xızmeti
