Ózbekstan Respublikası Prezidentiniń 2017-jıl 14-mart kúngi «Huqıqbuzarlıq profilaktikası hám jınayatshılıqqa qarsı gúresiw sistemasın jáne de jetilistiriw is-ilajları haqqında»ǵı PQ-2833-sanlı qararına muwapıq hápteniń hár piyshembi kúni huqıqbuzarlıq profilaktikası kúni dep belgilengen.
Usı múnásibet penen universitet mádeniyat sarayında Dene mádeniyatı fakulteti student-jasları arasında jınayatshılıq hám huqıqbuzarlıqtıń aldın alıw, oǵan qarsı gúresiw hám de olar arasında profilaktikalıq úgit-násiyatlaw jumısların alıp barıw maqsetinde «Huqıqbuzarlıq hám jınayatshılıqqa qarsı birgelikte gúresemiz!» hám de «Jawızlıqqa qarsı aǵartıwshılıq» atamalarında profilaktikalıq úgit-násiyatlaw ilajı ótkerildi.
Ilajǵa Dene mádeniyatı fakultetiniń jaslar menen islesiw boyınsha dekan orınbasarı R.Óteniyazov, Nókis qalalıq IIOJM basqarması baslıǵı orınbasarı, podpolkovnik A.Tleumuratov, QR IIM JHQB aǵa inspektorı, mayor M.Seytnazarov, Nókis qalası Muxammed Baqıy iyshan jome meshiti imam-xatibi Sh.Qudaybergenov, QR IIM Kiberqáwipsizlik bólimi baslıǵı D.Seytmuratov, oqıw isleri boyınsha dekan orınbasarı A.Nurjanov, QMU hayal-qızlar máseleleri boyınsha aǵa inspektorı, leytenant R.Tasbaeva, hayal-qızlar máseleleri boyınsha dekan másláhátshisi G.Óskinbaeva, tyutorlar hám student-jaslar qatnastı.
Ilajda bayanatshılar «Jaslar arasında, ásirese, studentler arasında júz berip atırǵan huqıqbuzarlıq hám jınayatshılıqtı saplastırıw máseleleri», «Jol háreketi yaki transportlardan paydalanıw qáwipsizligi qaǵıydaları», «Jawızlıqqa qarsı aǵartıwshılıq», «Sociallıq tarmaqlar yaki kiberqáwipsizlik haqqında túsinik» atamalarındaǵı óz bayanatların oqıp esittirip, huqıqbuzarlıq hám jınayatshılıqtıń aldın alıw boyınsha mámleketimizde bir qansha reformalar ámelge asırılıp atırǵanlıǵı, qabıl etilip atırǵan huqıqıy-normativ hújjetler, jaslardıń huqıqıy mádeniyatın joqarılatıw, puqaralardıń nızamǵa boysınıwları, huqıqbuzarlıq hám jınayatshılıqqa qarsı gúresiw arqalı jámiyetlik tártipti hám qáwipsizlikti saqlaw máseleleri, jınayatshılıqtıń erte aldın alıw zárúrligi, jámiyette júris-turıs qaǵıydaları, jol transport háreketi hám onnan paydalanıw qáwipsizligi qaǵıydaları, júz beriwi múmkin bolǵan huqıqbuzarlıqlar aqıbetinde elimiz ekonomikasına keltiriletuǵın zıyanlar, búgingi kúnde jaslar tárepinen islenip atırǵan jınayatlar, kafe-restoranlarda spirtli ishimlikler iship jánjellesiw halatları, avtoavariyalar, bir-birine dene jaraqatların jetkeriw hám basqa da hár túrli jınayıy islerge qol urıp, jınayıy juwapkershilikke tartılıwdıń aqıbetleri haqqında atap ótti.
Ilaj dawamında puqaralar tárepinen islengen huqıqbuzarlıq hám jınayatlar hám de «Jawızlıqqa qarsı aǵartıwshılıq» mazmunın ózine jámlegen videofilmler qoyıp berildi hám bul boyınsha studentler ózleriniń qızıqtırǵan sorawlarına taraw qánigelerinen tiyisli juwaplar aldı. Ilaj sońında usı jıldıń 25-28-oktyabr kúnleri aralıǵında «Biz jaslar huqıqbuzarlıq hám jınayatshılıqqa birgelikte qarsı gúresemiz!» uranı astında Dene mádeniyatı fakulteti student-qızları arasında sporttıń stol tennisi hám jeńil atletika túrleri boyınsha ótkerilgen jarıs jeńimpazları sawǵalar hám diplomlar menen sıylıqlandı. Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
