Búgin Berdaq atındaǵı Qaraqalpaq mámleketlik universiteti mádeniyat sarayında barlıq fakultet jaslar menen islesiw boyınsha dekan orınbasarları, tyutorları qatnasında májilis bolıp ótti. Onda Qaraqalpaqstan Respublikası Ayrıqsha jaǵdaylar basqarması baslıǵı orınbasarı polkovnik M.Seydullaev, Nókis qalalıq Ayrıqsha jaǵdaylar bólimi baslıǵı orınbasarı mayor Q.Ametov universitetimizdiń profilaktika inspektorı I.Erejepov hám barlıq fakultet dekan orınbasarları, tyutorları qatnastı.
Májilisti universitetimizdıń jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov basqarıp bardı. Dáslep ol óz sózinde, gúz-qıs máwsimi keliwi menen barlıq fakultet tyutorları tárepinen iyis gazden záhárleniw hám órttiń aldın alıw boyınsha ijarda jasawshı student-jaslar menen úgit-násiyat ilajları turaqlı túrde alıp barılıp atırılǵanlıǵı haqqında aytıp ótti. Bunnan soń, Qaraqalpaqstan Respublikası Ayrıqsha jaǵdaylar basqarması baslıǵı orınbasarı polkovnik M.Seydullaev sózge shıǵıp, tabiyiy gazdiń tolıq janbawı, tosattan úzilip qalıwı, bólme ishinde toplanıwı, tabiyiy gazdi jaǵıp qarawsız qaldırıw, trubalardı jalǵawda qawipsizlik qaǵıydalarına ámel etpeslik aqıbetinde gaz ushqınlanıwı, iyis gazinen záhárleniw jaǵdayları sıyaqlı ayrıqsha jaǵdaylar júzege keliwi haqqında aytıp, bunday jaǵdaylardıń aldın alıw boyınsha barlıq tyutorlardı birgelikte jumıs alıp barıwǵa shaqırdı.
Sonday-aq, ilajda universitetimiz jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov tárepinen jańa 2022/2023 oqıw jılı baslanıwı menen ótken eki ay ishinde tyutorlar tárepinen ámelge asırılǵan jumıslardıń nátiyjeligi kórip shıǵılıp, jol qoyılǵan qáte kemshilikler sınǵa alındı. Bunday jol qoyılǵan qáte kemshiliklerdi óz waqtında saplastırıw, sonıń menen bir qatarda aldaǵı waqıtları isleniwi tiyis bolǵan ilajlar haqqında rejeler belgilep alındı.
QMU baspasóz xızmeti
