Búgin Berdaq atındaǵı Qaraqalpaq mámleketlik universitetinde Qaraqalpaqstan Respublikasına miyneti sińgen ilim ǵayratkeri, filologiya ilimleriniń doktorı, professor Qálimbet Sultanovtıń 90 jıllıq yubileyine arnalǵan «Qaraqalpaq ádebiyattanıw iliminiń kórnekli wákili» atamasındaǵı respublikalıq ilimiy-teoriyalıq konferenciyası bolıp ótti.

Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Dáslep, Filologiya ilimleriniń doktorı, professor Sh.Abdinazimov sózge shıǵıp, Qálimbet Sultanovtıń ómir jolı onın Qaraqalpaq ádebiyattanıw iliminde ornı, ilimiy izertlew jumıslarında qaraqalpaq memuar hám avtobiografiyalıq prozasınıń ózgesheligi, qaraqalpaq tariyxıy romanshılıǵın qáliplestiriwdegi dóretiwshilik xızmeti haqqında sóz etti.

Bunnan soń, universitetimizdiń «Qaraqalpaq ádebiyatı» kafedrası docenti, filologiya ilimleriniń doktorı P.Nurjanov sózge shıǵıp, ilimpazdıń qaraqalpaq proza menen birge qaraqalpaq dramaturgiyası hám poeziyası máselelerin izertlew menen shuǵıllanǵanlıǵı, sonday-aq kúndelikli baspasózde qaraqalpaq klassikalıq ádebiyatı, XX ásir qaraqalpaq ádebiyatı wákilleriniń dóretiwshiligi boyınsha ilimiy-teoriyalıq maqalaların aytıp ótti.

Sonıń menen bir qatarda ilajda sózge shıqqanlar universitetimizde ótkerilip atırılǵan «Qaraqalpaq ádebiyattanıw iliminiń kórnekli wákili» atamasındaǵı respublikalıq ilimiy-teoriyalıq konferenciya jumıslarına tabıslar tilep, kóplegen insanlardıń ustazı, óz isiniń haqıyqıy pidayısı bolǵan insan Qálimbet Sultanovtıń búgingi 90 jıllıq yubileyi menen qızǵın qutlıqladı. Ustazımızdıń talapshańlıǵı, pidayılıǵı, onıń islegen qayırlı isleri, biziń qálbimizde máńgi saqlanıp qaladı.

QMU baspasóz xızmeti