Ósip kiyatırǵan jaslarımızdı Watandı súyiwshilik, milliy dástúr hám qádiriyatlarǵa sadıqlıq, ullı ata-babalarımızdıń bay miyrasınıń dawamshısı ruwxında tárbiyalaw maqsetinde oqıw orınlarında ruwxıy-aǵartıwshılıq ilajların ótkeriw jaqsı jolǵa qoyılǵan.

Mine, usınday ilajlardıń biri Berdaq atındaǵı Qaraqalpaq mámleketlik universitetiniń Tariyx fakulteti studentleri menen birgelikte «Diniy ekstremizm hám terrorizmge qarsı gúresemiz!» hám «Jawızlıqqa qarsı aǵartıwshılıq» temalarında bolıp ótti. Ilajdı Tariyx fakulteti dekanınıń ruwxıy-aǵartıwshılıq máseleleri boyınsha orınbasarı Z.Qıdırniyazov alıp bardı.

Ilaj barısında shıǵıp sóylegen Ózbekstan Respublikası Ministrler Kabineti janındaǵı Din isleri boyınsha komitetiniń Qaraqalpaqstan Respublikası aymaqlıq basqarması bas qánigesi Nurulla Jamalov student jaslarǵa mámlekettiń bir pútinligin hám xalıqtıń tınısh-tatıwlıǵın buzıwda diniy ekstremizm hám terrorizmniń qáwipli illet ekenligin, bunday qáwipli hámde jawız niyetli qara kúshlerge tek ǵana tereń bilim, bay ruwxıy dúnya, sonday-aq, aǵartıwshılıq penen qarsı gúresiw óziniń jaqsı nátiyjesin beretuǵınlıǵın aytıp ótti. Studentler ózlerin qızıqtırǵan sorawlarǵa tiyisli juwapların aldı. Áhmiyetli temalarǵa baǵıshlanıp ótkerilgen bul ilajǵa Tariyx fakultetiniń studentleri hám tyutorları qatnastı.     

B.Esemuratova,

Tariyx fakultetiniń tyutorı