Búgin Berdaq atındaǵı Qaraqalpaq mámleketlik universitetinde Qaraqalpaqstan Respublikasına xızmet korsetken ilim ǵayratkeri, Qaraqalpaqstan Respublikası Konstituciyalıq baqlaw komitetiniń aǵzası, yuridika ilimleri doktorı, professor Elizaveta Kutıbaevanıń 65 jasqa tolǵan yubileyine baǵıshlanǵan ushırasıw keshesi bolıp ótti.
Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Ushırasıwdı universitetimizdiń rektorı Axmed Reymov ashıp berdi hám basqarıp bardı. Ol óz sozinde Házirgi waqıtta, Húrmetli Prezidentimizdin tikkeley baslaması menen, jámiyetimizde ilimniń rolin kúsheytiw, ásirese, akademiyalıq ilimniń abıroyın arttırıw, ilim tarawınıń intellektual potencialın bekkemlew, talantlı jaslardı ilimge keńnen tartıw hám ilim jolında pidákerlik penen xızmet etken alımlardıń mashaqatlı miynetlerin qádirlew mámleketlik siyasatı dárejesine kóterilgenin aytıp ótti. Sonday-aq bul tarawda barlıq kúsh-jigerin, bilimin hám ilimiy tájiriybesin Qaraqalpaqstan hám Ózbekistannıń basqa wálayatlarınıń huqıq qorǵaw uyımları ushın joqarı qánigeli kadrlardı tayarlawǵa jumsaǵan insan Qaraqalpaqstan Respublikasına xızmet korsetken ilim ǵayratkeri, Qaraqalpaqstan Respublikası Konstituciyalıq baqlaw komitetiniń aǵzası, yuridika ilimleri doktorı, professor Elizaveta Kutıbaevanıń 65 jasqa tolıwı menen qızǵın qutlıqladı.
Ushırasıwda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev shıǵıp sóylep, E.Kutıbaevanıń 65 jasqa tolıwı múnásibeti menen Qaraqalpaqstan Respublikası Joqarǵı Keńesi atınan qutlıqlap, Qaraqalpaqstan Respublikası Joqarǵı Keńesiniń “Ardaqlı nuranıy” kókirek belgisin tapsırdı. Bunnan soń, Yuridika fakulteti dekenaı F.Qutlımuratov ustazdıń ómir jolı, ilimiy miynetleri, ilimiy–pedagogikalıq hám jámiyetlik–siyasiy jumıslardaǵı belsendiligi haqqında bayanat jasadı. Haqıyqatında da Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. Búgin Qaraqalpaqstan Respublikasına xızmet korsetken ilim ǵayratkeri, Qaraqalpaqstan Respublikası Konstituciyalıq baqlaw komitetiniń aǵzası, yuridika ilimleri doktorı, professor talantlı shólkemlestiriwshi, talapshań hám miyirman ustaz, óz isiniń haqıyqıy pidayısı bolǵan Elizaveta Kutıbaevanıń 65 jasqa tolǵan yubileyi menen universitetimiz jámááti atınan qızǵın qutlıqlaymız! Ustazǵa bekkem densawlıq, ilimiy-dóretiwshilik jumıslarında tabıslar tilep qalamız.
QMU baspasóz xızmeti
