Usı jıldıń  23-noyabr kúni Berdaq milliy muzeyinde Dene mádeniyatı fakulteti tárepinen Berdaq Ǵarǵabay ulınıń 195 jıllıǵı múnásibeti menen «Berdaq miyrası – milliy, mánawiy baylıǵımız» atamasında ádebiy keshe ótkerildi. Keshege Dene mádeniyatı fakultetiniń jaslar menen islesiw boyınsha dekan orınbasarı R.Óteniyazov, Berdaq milliy muzeyi direktorı Sh.Payzullaeva, tyutorlar hám student-jaslar qatnastı. Ilajda Berdaq milliy muzeyi direktorı, ádebiyatshı hám Berdaqtanıwshı Sh.Payzullaeva Berdaq shayır babamızdıń ómir jolı, dóretiwshiligi haqqında keshe qatnasıwshılarına keńnen túsinidirip ótti.

XIX ásirde jasap ótken Qaraqalpaq klassik shayırlarınıń ishinde óziniń ayrıqsha talantı, bahalı shıǵarmaları hám dóretiwshiligi menen tanılǵan, keleshek áwladqa ózinen biybaha miyras qaldırǵan Berdaq babamız, tariyxıy tulǵalardıń biri bolıp tabıladı. Ol óz dáwirinde hár qanday zorlıq-zombılıqlarǵa qarsı turıp, jámiyettegi jaman illetlerdi áshkaralap, watanlasların awızbirshilikli, márt bolıwǵa shaqırdı. Óziniń ótkir tili, shireli sózi hám de zawıqlı qosıqları menen qaraqalpaq poeziyasında miynetleri óz sáwleleniwin tapqan. Sonday-aq, keshe dawamında Kórkem óner fakulteti hám Dene mádeniyatı fakulteti studentleri tárepinen tayarlanǵan kórkem ádebiy bólim qatnasıwshılar názerine usınıldı. Berdaq babamızdıń shıǵarmaları hám dóretiwshiligi milliy mánawiy miyras hám jaslar tálim-tárbiyasında úlken orın iyeleydi.

N.Aytniyazova
Dene mádeniyatı fakulteti tyutorı