Búgingi kúnde mámleketimizde bilimlendiriw tarawın rawajlandırıwǵa ayrıqsha itibar qaratılıp atırǵanı hesh kimge sır emes. Ásirese sırt el joqarı oqıw orınları menen birge islesiw Memorandumı tiykarında oqıw-metodikalıq, ilim-izertlew hám tájiriybe almasıw jumısları ámelge asırılmaqta.
Usınday joqarı oqıw orınlarınıń biri Turkiyanıń Izmir qalasındaǵı Ege universiteti bolıp, bul universitet Turkiyadaǵı eń úlken hám kúshli 3 universitettiń biri esaplanadı. QMU rektorı prof. A.Reymov basshılıǵında búgingi kúni Qaraqalpaq mámleketlik universiteti menen Ege universiteti arasında birge islesiw hám tájiriybe almasıw jumısları jaqsı jolǵa qoyılǵan.
Usı tiykarda 2022-jıl 18-28 noyabr kúnleri Biologiya fakulteti dekanı biologiya ilimleri doktorı, professor Yakub Ametov Ege universitetinde xızmet saparında boldı. Sapardan gózlengen tiykarǵı maqset – Qaraqalpaq mámleketlik universitetiniń Biologiya fakulteti menen Ege universitetiniń Awıl-xojalıǵı fakulteti hám Ilim fakultetiniń Biologiya bólimi arasında tájiriybe almasıw, ilim-izertlew jumısların bekkemlew hám rawajlandırıw bolıp tabıladı.
Xızmet saparı dawamında Biologiya fakulteti dekanı prof. Yakub Ametov dáslep Ilim fakultetiniń dekanı prof. Dinçer AYAZ benen ushırastı. Ushırasıwda 2 fakultet dekanları fakultetler arasında «Óz-ara kelisiw Memorandumı»n imzaladı hám aldaǵı islenetuǵın jumıslar haqqında kelisip aldı.
Sapardıń dawamında prof. Yakub Ametov Awıl-xojalıǵı fakulteti dekanı prof. Banu YÜCEL menen ushırastı. Ushırasıwda 2 fakultettiń topıraqtanıw hám dárilik ósimlikler bólimleri arasında ilim-izertlew jumısların, sonıń ishinde ilimiy joybarlar boyınsha birge islesiwdi jolǵa qoyıw, bekkemlew hám rawajlandırıw boyınsha aldaǵı jumıslar haqqında kelisip alındı. Sonıń menen biq awıl-xojalıǵı hám Ilim fakultetleriniń kafedraları, tábiyat muzeyi, ilim-izertlew laboratoriyaları hám olardıń iskerligi menen jaqınnan tanıstı. Sonday aq Turkiyanıń haqıyqıy hám tákirarlanbas tábiyat qoynına shıǵıp Egey teńizi hám onıń átirapınıń haywanat hám ósimlikler dúnyası, qorǵalatuǵın tábiyǵıy aymaqları menen tanıstı.
Óz gezeginde Yakub Ametov Ilim fakultetiniń Biologiya bólimi student-jasları hám professor-oqıtıwshılarına «Aral hám Aral boyı ekologiyası» temasında seminar ótkerdi. Sonday aq seminar qatnasıwshıların Qaraqalpaq mámleketlik universitetiniń Biologiya fakulteti iskerligi menen jaqınnan tanıstırdı. Eki universitet arasında islenip atırǵan bul jumıslar keleshekte óz nátiyjesin berip Qaraqalpaq mámleketlik universitetiniń gúllep rawajlanıwına, universitetimizdiń jáhán arenasında aldıńǵı orınlarǵa shıǵıwına isenemiz.
