Usı jıl 7-dekabr  kúni Berdaq muzeyinde «Abay miyrası – urpaqqa ulaǵat» temasında  qazaq tili hám ádebiyatı kafedrası professor-oqıtıwshıları hám studentleriniń shólkemlestiriwi menen ádebiy-muzıkalı keshe ótkerildi. Kesheni Ózbek filologiyası fakultetiniń dekanı doc. M.Qurbaniyazov  ashıp berdi.

  Ótkerigen ilajda universitettiń Qazaq tili hám ádebiyatı kafedrası baslıǵı doc. G.Adilova «Abay– qazaq ádebiy tiliniń tiykarın salıwshı» degen temada, Ájiniyaz atındaǵı Nókis mámleketlik pedogogikalıq institutı, Qazaq tili hám ádebiyatı kafedrasınıń docenti T.Tórtkulbaeva «Abay poeziyasındaǵı adamgershilik muratlar» degen temada bayanatlar jasadı.

 Ádebi-muzıkalı kesheniń ekinshi bólimi tiykarınan ullı shayırdıń dóretiwshiligine arnaldı. Abay Qunanbaevtıń ómir jolına arnalǵan videorolik, Sonıń menen birge, Qazaq tili bakalavr baǵdarı student-jasları shayır qosıqların qazaq, qaraqalpaq, ózbek, túrkmen hám rus tillerinde oqıp, shayırdıń ómiri  hám  dóretpelerinen  saxnalıq kórinisler  kórsetti. 

 Qazaq xalqınıń ullı shayırı Abay  Qunanbaevtıń ádebiy miyrasların  úyreniw dawam ete beretuǵın process, shayırdıń ótkir oylı qosıqları menen qara sózleri heshqashan da óziniń  tálim-táribiyalıq mánisin joyıtpaydı.