«Teleradio jurnalistikanıń áhmiyetli máseleleri» ̶ «Jas jurnalistler klubı»nıń náwbetegi sheberlik sabaǵında úyrenilgen másele usı temaǵa arnaldı. Usı maqsette «Qaraqalpaqstan» telekanalınıń «Xabar» baǵdarlamaları redakciyası bas redaktorı Baynazar Dáuletnazarov hám «Qaraqalpaqstan» radiokanalı siyasiy-jámiyetlik baǵdarlamalar redakciyası bas redaktorı Nursulıw Begimova mirát etildi.

Dáslep klub baslıǵı Jurnalistika kafedrası docenti Z.Qojıqbaeva shıǵıp sóylep, ǵalaba xabar quralları arasında radio hám televidenieniń ózgesheligi haqqında aytıp ótti. Onnan soń huqıqıy hám siyasiy temada material tayarlaw boyınsha pikirlesti. Radio hám telekanalda jańalıqlarda toplaw, qayta islew hám tarqatıw baǵdarındaǵı jumıslar izbe-izligi, kúnniń temasın tabıw hám materialdı montaj islew baǵdarında túsinik berildi. Bul ushrasıwda jurnalistler student jaslar menen erkin sáwbet ótkerdi. Sáwbet dawamında jurnalistler ózleriniń tájriybelerinen kelip shıqqan halda student-jaslarǵa óz másláhátlerin berdi. Jaslar ózlerin qızıqtırǵan sorawlarına juwaplar taba aldı.
-Diktor hám alıp barıwshı xızmeti eń ańsat is,-dep oylaytuǵın edik,- deydi A.Reymova,- Xabar baǵdarlamasında alıp barıwshılar jumısınıń quramalı ekenligin ámelde sezindim hám olardıń kásibine mehirim astı. Qánigeler bunday ushırasıwlar dawamlı bolıwın tilep qalamız.

Gulchehra Turǵanbaeva,

Teleradiojurnalistikası qánigeliginiń 1-kurs studenti