Korrupciya mashqalası búgingi kúnde jámiyettiń rawajlanıwına tosqınlıq etetuǵın tiykarǵı faktorlardıń biri esaplanadı. Bunday jaman illetti boldırmaw hám usınday unamsız jaǵdaylarǵa qarsı gúresiw maqsetinde búgin Berdaq atındaǵı Qaraqalpaq mámleketlik universiteti Qaraqalpaq filologiyası hám jurnalistika fakulteti professor-oqıtıwshıları, tyutorları qatnasında «Korrupciyanıń aldın alıw hám oǵan qarsı gúresiw» atamasında ushırasıw bolıp ótti.
Oǵan universitettiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, Korrupciyaǵa qarsı gúresiw «Kompleans qadaǵalaw» bólimi baslıǵı K.Uteniyazovlar qatnastı. Ushırasıwdı fakultet dekanı Q.Turdıbaev basqarıp bardı. Dáslep universitetimiz jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov sózge shıǵıp, búgingi kúnde korrupciyaǵa qarsı gúres hám onıń aldın alıwǵa dúnya júzinde, sonıń ishinde Ózbekstan Respublikasında da ayrıqsha dıqqat qaratılǵanlıǵın, korrupciya – jámiyettiń rawajlanıwına keri tásir etip qoymastan, elimizdegi háreket etip turǵan nızamlarǵa isenimsizlik payda etetuǵınlıǵın, usınday unamsız jaǵdaylarǵa qarsı gúresiw búgingi kún siyasatınıń áhmiyetli máseleleriniń biri ekenligin aytıp ótti.
Bunnan soń, Korrupciyaǵa qarsı gúresiw Kompleans qadaǵalaw bólimi baslıǵı K.Uteniyazov, sózge shıǵıp, búgingi kúnde korrupciyaǵa qarsı gúresiw hám bunday jaman illetti boldırmaw baǵdarındaǵı wazıypalardıń orınlanıwın támiyinlew maqsetinde universitet professor-oqıtıwshıları hám student-jasları arasında korrupciyaǵa qarsı gúresiw hám onıń aldın alıwǵa qaratılǵan túsinik jumısların alıp barılıp atırılǵanlıǵı, biraq ayrım professor-oqıtıwshılar arasında korrupciya menen baylanıslı halatlardıń elde ushırasıp atırǵanlıǵın aytıp ótti. Sonday-aq ilajda sózge shıqqanlar, korrupciyanın aldın alıwda jámiyetshilik qadaǵalawın kúsheytiw kerek ekenligin aytıp, bársheni bul jaman illetke qarsı gúresiwde biyparwa bolmawǵa shaqırdı.
QMU baspasóz xızmeti
