Húrmetli Prezidentimizdiń óz shıǵıp sóylewinde “Jaslar – keleshek iyeleri, mámlekettiń úlken baylıǵı, biybaha ǵáziynesi, jańa renessans dáwiriniń qurıwshıları…” dep aytqan edi. Usı tiykarda búgin Berdaq atındaǵı Qaraqalpaq mámleketlik universitetinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev respublikamız aymaǵındaǵı joqarı oqıw orınlarınıń student-jasları menen ushırastı.
Ushırasıwda barlıq joqarı oqıw orınlarınıń rektorları, direktorları prokrektorları hám belsendi student-jasları qatnastı. Dáslep Qaraqalpaqstan Respublikası Joqarǵı Keńesiniń Baslıǵı A.Orınbaev sózge shıǵıp, búgingi kúnde mámleketimizde bilimlendiriw tarawın rawajlandırıw, jańa reformalardı ámelge asırıw mámleket siyasatınıń baslı baǵdarlarınıń biri ekenligin, bilimlendiriw sistemasın jaqsılaw, onı zaman talapları tiykarında modernizaciyalaw, jaslardı joqarı bilimli, fizikalıq hám ruwxıy bay insan etip tárbiyalaw, student-jaslardı sociallıq qorǵaw sistemasın jetilistiriw, olardıń talantın hám qábiletlerin júzege shıǵarıw, bilimlendiriw mákemeleriniń basshı hám pedagog xızmetkerleriniń abıroyın asırıw, olardıń nátiyjeli miynet etiwi ushın zárúr shártsharayatlar jaratıw boyınsha bir qatar jumıslar alıp barılıp atırǵanlıǵın atap ótti.
Sonday-aq, Húrmetli Prezidentimizdiń bilimlendiriw tarawına bolǵan ayrıqsha itibarı nátiyjesinde Qaraqalpaqstan Respublikasında jaqarı oqıw orınları sanı 10 ǵa jetkenligi, jaslarımızdı joqarı oqıw ornına qamtıp alıw dárejesi 9% ten 36%ke artqanlıǵı, sonıń menen birge, shetki rayonlardaǵı student-jaslarımızǵa qolaylıq jaratıw maqsetinde Berdaq atındaǵı Qaraqalpaq mámleketlik universitetiniń jańadan Shımbay fakulteti, Ájiniyaz atındaǵı Nókis mámleketlik pedagogikalıq institutınıń Ellikqala pedagogika fakulteti, Tashkent mámleketlik ekonomika universitetiniń Tórtkúl fakultetleriniń ashılıwı bulda Húrmetli Prezidentimizdiń jaslarǵa bolǵan atalarsha ǵamqorlı ekenligin, bunday jaratılǵan imkaniyatlardan búgingi kúnde student-jaslarımız aqılǵa muwapıq paydalanıp, Prezident, Nawayı, Ulıǵbek stipendiyaları, Zulfiya atındaǵı mámleketlik sıylıǵı, «Mard oʻgʻlon», «Kelajak bunyodkori» sıylıǵınıń iyeleri, respublikalıq, xalıqaralıq tańlawlardıń jeńimpazları, Jáhán hám Aziya chempionları jetilisip shıǵıp atırǵanlıǵın óz bayanatınada keltirip ótti.
Ótkerilgen ushırasıwda student-jaslar ózleriniń bilimlendiriw tarawı, isbilermenlik, innovaciyalıq texnologiyalar boyınsha pikir-usınıslar bildirilip, óz gezeginde Joqarǵı Keńes Baslıǵı tárepinen bildirilgen hár qanday baslama, pikir-usınıslar qollap-quwatlaytuǵınlıǵın hám bunday ushırasıwlar aldaǵı waqıtları tez-tezden shólkemlestirip, ótkerip turıw boyınsha usınısların bildirdi.
QMU baspasóz xızmeti
