Ózbekstan Respublikası Joqarı bilimlendiriw, ilim hám innovaciyalar ministrligi tárepinen joqarı oqıw orınlarında 2023/2024-oqıw jılında alternativ energetikadan paydalanıw ilajların kóriw tapsırması tiykarında JOOlar tárepinen alternativ energiya dereklerin ornatıw boyınsha bar múmkinshiliklerdi úyreniw maqsetinde tómendegi wazıypalar belgilep berilgen edi:

 − elektr energiya menen támiyinleytuǵın quyash panellerin ornatıw jumıslarına ayrıqsha itibar qaratıw ;

 − JOOlarnıń ámeldegi oqıw, laboratoriya, qosımsha xanalar hám jataqxana imaratlarınıń tóbesine tiyisli taraw qánigeleri menen másláhátlesken halda quyash panellerin ornatıw múmkinshiliklerin anıqlaw;

 − qansha kvt quwatqa iye bolǵan panellerdi jaylastırıw múmkinshiligin anıqlaw ;

 − ornatılıwı múmkin bolǵan quyash panelleri arqalı bar múmkinshiliktiń qansha bólegin qaplaw deregin anıqlaw.

Usı berilgen tapsırmalardıń orınlanıwın kózden ótkeriw maqsetinde búgin 20-fevral kúni Qaraqalpaqstan Respulikası Innovaciyalıq rawajlanıw aymaqlıq basqarmasınıń baslıǵı N.Kayupov Berdaq atındaǵı Qaraqalpaq mámleketlik universitetinde boldı. Onda universitettiń barlıq prorektorları qatnasında ushırasıw bolıp ótti. Ushırasıwda aldaǵı waqıtları isleniwi tiyis bolǵan wazıypalar haqqında sáwbetlesip, tapsırmalar berildi. Sonday-aq, universitet rektorı A.Reymov Qaraqalpaq mámleketlik universitetinıń oqıw imaratlarında jataqxanalarda qayta tikleniwshi energiya dereklerin ornatıw boyınsha prezentaciya isledi hám házirgi waqıtta universitette laboratoriya hám jataqxanalardaǵı ısıtıw úskeneleri ushın islep turǵan quyash panelleri menen tanıstırdı.

Maǵlıwmat ornında búgingi kúnde, Berdaq atındaǵı Qaraqalpaq mámleketlik universitetine jámi talap etiletuǵın elektr energiyası 1960,0 mıń kVt/2000 = 980 kVt quraydı. Házirgi waqıtta universitettiń 5, 7, 8-sanlı studentler turar úylerinde 3200 litrli suw ısıtıw úskenesi hámde quwatı 10 kVt bolǵan 100 dana quyash panelleri ornatılǵan.

QMU baspasóz xızmeti