Húrmetli Prezidentimiz aytqanınday rawajlanıwdıń tiykarǵı irge tası da, mámleketti qúdiretli etetuǵın, kúsh bul, ilim, tálim hám tárbiya bolıp tabıladı degen edi. Usı tiykarda 2023-jıl 22-fevral kúni Berdaq atındaǵı Qaraqalpaq mámleketlik universitetinde student-jaslar arasında tálim-tárbiya sapasın jaqsılaw maqsetinde professor-oqtıwshılar qatnasında májilis bolıp ótti.
Onda universitetimizdiń professor-oqıtıwshıları prorektorları, bólim baslıqları, barlıq fakultet dekanları, dekan orınbasarları qatnastı. Májilisti Berdaq atındaǵı Qaraqalpaq mámleketlik universiteti rektorı A.Reymov basqarıp bardı hám ol óz sózinde búgingi kúnde Mámleketimiz tárepinen bilimlendiriw sistemasında alıp barılıp atırǵan jumıslar, ámelge asırılıp atırǵan reformalar, jaslarımızǵa berilip atırılǵan imkaniyatlardı student-jaslarımız arasında keń túrde úgit-násiyatlaw, olardıń tálim-tárbiyasına, keleshekte mámleketimizdiń rawajlanıwına úles qosatuǵın jetik kadrlar bolıp jetilisiwinde hámme teńdey juwapker ekenligin, sonday-aq, jaslardı tárbiyalawda, biz professor-oqıtıwshılar ózlerimiz órnek bolıwmız kerekligin aytıp ótti.
Bunnan soń, Fizika-matematika ilimleriniń kandidatı, professor B.Abdikamalov, Filologiya ilimleriniń doktorı, professor Sh.Abdinazimov, Filosofiya ilimleriniń kandidatı J.Sagindikovlar sózge shıǵıp, student-jaslar arasında tálim-tárbiya procesin jaqsılaw hám olarǵa bilim beriw baǵdarındaǵı minnetlemelerimizdi elde asırıw maqsetinde hámme awızbirshilikte háreket etiw kerekligin aytıp, aldaǵı waqıtları ustazlar tárepinen hár bir fakulttete jası úlken tájiriybeli, jaslarǵa órnek bolatuǵın ustazlardıń turaqlı ráwishte seminarları shólkemlestirilip barılıwı boyınsha usınıslar bildirilip, bul usınıs tez kúnde jolǵa qoyılatuǵınlıǵı atap ótildi.
Haqıyqatında da student-jaslardı hár tárepleme jetik kadr etip tárbiyalaw, olar menen islesiwdiń zamanagóy usılların jaratıw hám globallasıw talaplarına juwap beretuǵın nátiyjeli mexanizmlerdi ámeliyatqa engiziwdi búgingi dáwirdiń ózi talap etpekte.
Sonlıqtanda, jaslardı zaman talaplarına juwap beretuǵın, bilimli, hár tárepleme keń pikirley alatuǵın jas kadrlardı tárbiyalaw búgingi kún bilimlendiriw mákemeleri aldında turǵan áhmiyetli wazıypalardan biri esaplanadı
QMU baspasóz xızmeti
