Usı jıldıń 10-aprel kúni Berdaq atındaǵı Qaraqalpaq mámleketlik universitetinde Ózbekstan xalıq bilimlendiriw aǵlası, Abdurahmon Madaminovtıń 70 jıllıq yubileyine arnalǵan «Zamonaviy filologiyaning dolzarb masalalari: yangicha yondashuv va tamoyillar» atamasındaǵı respublikalıq ilimiy- konferenciya bolıp ótti.
Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Konferenciyanı universitetimizdiń Jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov ashıp berdi hám alıp bardı. Ol óz sozinde házirgi waqıtta, Húrmetli Prezidentimizdin tikkeley baslaması menen, jámiyetimizde ilimniń rolin kúsheytiw, ásirese, akademiyalıq ilimniń abıroyın arttırıw, ilim tarawınıń intellektual potencialın bekkemlew, talantlı jaslardı ilimge keńnen tartıw hám ilim jolında pidákerlik penen xızmet etken alımlardıń mashaqatlı miynetlerin qádirlew mámleketlik siyasatı dárejesine kóterilgenin aytıp ótti. Sonday-aq bul tarawda barlıq kúsh-jigerin, bilimin hám ilimiy tájiriybesin jaslarǵa ayanbay úyretip kiyatırǵan Ózbekstan xalıq bilimlendiriw aǵlası, Berdaq atındaǵı Qaraqalpaq mámleketlik universiteti Ózbek til bilimi kafedrası docenti filologiyagiya ilimleriniń kandidatı Abdurahmon Madaminovtıń miynetlerin ayrıqsha maqtanısh penen atap, onıń búgingi múbárek 70 jası menen qutlıqlap, konferenciya jumıslarına tabıslar tiledi.
Bunnan soń, sózge shıqqanlar ustazdıń ómir jolı, ilimiy miynetleri, ilimiy–pedagogikalıq hám jámiyetlik–siyasiy jumıslardaǵı belsendiligi haqqında bayanat jasadı. Haqıyqatında da Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. Búgin biz Ózbekstan xalıq bilimlendiriw aǵlası, Berdaq atındaǵı Qaraqalpaq mámleketlik universiteti Ózbek til bilimi kafedrası docenti filologiyagiya ilimleriniń kandidatı Abdurahmon Madaminovtıń 70 jasqa tolǵan yubileyi menen universitetimiz jámááti atınan qızǵın qutlıqlaymız! Ustazǵa bekkem densawlıq, ilimiy-dóretiwshilik jumıslarında tabıslar tilep qalamız.
QMU baspasóz xızmeti
