Búgin elimiz úlken siyasiy process – jańa, zaman talaplarına say, mámleketimizdi hár tárepleme biyik shoqqılarǵa kóteriwge baǵdarlawshı mazmun menen bayıtılǵan Konstituciyamızdı qabıl etiw qarsańında turıptı. Insaniyat tariyxında jámiyet rawajlanǵan sayın nızamlar jámiyet turmısına say túrde jetilistirip kelingen. Sol mánisten alıp qaraǵanda, búgin de mámleketimizde insan qádiri, ózligi, xalıqtıń pikiri hám arzıw niyetleri tiykarında kóp milletli xalqımızdıń qádir-qımbatı baslı kriterya etip alınǵanlıǵı jańalanıp atırǵan Konstituciyamızdıń biz ushın qádirin hám turmıslıq áhmiyetin jáne de asırmaqta.

Jańalanıp atırǵan Ózbekstanımızdıń búgingi turmısında mektepke shekemgi bilimlendiriw mákemelerinen baslap orta hám joqarı oqıw orınlarına shekem barlıq jerlerde, máhállelerde belsendi puqaralarımız, pidáyı jaslarımız, siyasiy wákiller, keń jámiyetshilik, bir sóz benen aytqanda, xalqımız bir kúsh, ulıwma bir tatıw shańaraq bolıp Konstituciyalıq referendum aldınan túrli ilajlar ótkermekte. Kóterinki keypiyat payda etip atırǵan “Konstituciya meniki, seniki, biziki! Konstituciya – ózimizdiki!” bas ideyası – xalıqtıń sózi, adamlarımızdıń erteńgi kúnge bolǵan úmit hám isenimin ózinde sáwlelendirmekte.

Elimiz boylap ótkerilip atırǵan bul ilaj hám ushırasıwlardı pedagog sıpaında gúzeter ekenmen, oqıtıwshılarımızdıń jańalanıp atırǵan Konstituciyadan úlken úmit kútip atırǵanlıǵın tereń sezinemen. Sebebi jańalanıp atırǵan Bas Nızamımızda bilimlendiriw tarawına bolǵan múmkinshiliklerdiń bekkemlenip qoyılıwı biz pedagoglardıń ilim-bilim jolındaǵı miynetimizdiń nátiyjeliliginiń asıwına huqıqıy tiykar bolıp xızmet etedi.
Xalıq erkinliginiń kepili bolǵan, olardıń pikiri tiykarında jańalanıp atırǵan Konstituciyamızdıń 50- hám 52-statyalarında jámiyetimizde oqıtıwshınıń mártebesi hám ornına arnalıp, keleshekte “Ustaz” sóziniń tek sulıw sózler sıpatında ǵana tilge alınıp qoymastan, onıń abıroyı hám qádiri biyik bolǵan, keleshek áwladtı bárkámal shaxs, kámil insan etip tárbiyalaytuǵın ustaz-pedagoglarımızdıń ornı hám kásiplik ósiwine bolǵan ǵamqorlıǵı sáwlelengenin atap ótiwimiz orınlı.

Basqasha aytqanda, endi oqıtıwshı hákimlik hám atqarıwshı buwınnıń “járdemshi kúshi” emes, ol jámiyette óz aktiv poziciyasına iye bolǵan, haq-huqıqları mámleket tárepinen kepillengen shaxs sıpatında haqılı ornın iyeleydi. Biz oqıtıwshı-pedagoglarǵa jańalanıp atırǵan Konstituciyamızda ayrıqsha itibar qaratılıp, huqıqlarımızǵa tolıq kepillik berilgeni nátiyjesinde turmısımızdıń barlıq tarawlarında biz úlken jańalanıwlar hám bunnan da joqarı shoqqılardı qolǵa kiritiwimizge gúman joq. Óytkeni hár bir kásiptiń hám tarawdıń tiykarında oqıtıwshı-pedagoglardıń miyneti turadı.

Ulıwma biologiya hám fiziologiya kafedrası baslıǵı,

biologiya ilimleri doktorı ,professor A.T.Matchanov