Jaqında TMEU professorı Baxodir Xasanov hámde Qaraqalpaq mámleketlik universiteti «Buxgalteriyalıq esap hám audit» docenti wazıypasın atqarıwshı PhD Nurmanov Qarjawbay Tilewbaevichtiń “Methodological issues of strategic management accounting and analysis (Klasterler hám fermer xojalıqlarında strategiyalıq basqarıw esabı hám analiziniń metodologiyalıq tiykarları) atlı monografiyası ózbek hám qaraqalpaq tillerinde baspadan shıǵarılǵan edi.
Itibarlısı sonda, usı monografiya Ullı Britaniyanıń “GlobeEdit” baspasında 7 shet el tiline awdarmalanıp, baspadan shıqtı. Bunnan bılay bul oqıw qollanba dúnyanıń 200 millionnan artıq adam úlken qızıǵıwshılıq penen oqıp atırǵanı quwanıshlı xabar desek qáte bolmaydı.
Ózbekstanda basqarıw esabın xalıqaralıq standartlarǵa transformaciyalaw zárúrligi strategiyalıq basqarıw esabı hám analiziniń aldına shet el investorların zárúrli maǵlıwmat penen támiynlew hámde xalıq aralıq finans bazarına kiriw imkaniyatların keńeytiw wazıypasın qoyadı.
Mámleketimizdiń dúnya júzi ekonomikasına integraciyalasıwı strategiyalıq basqarıw esabın tutınıw qunı shınjırı, ónimdarlılıqtıń áhmiyetli kórsetkishler sisteması, tovardıń jasaw cikli boyınsha qárejetler hám finanslıq nátiyjelerdi anıqlaw, sap paydanıń ósiwine tásir etiwshi faktorlardı uzaq múddetli prognozlawdı talap etpekte.
Awıl xojalıǵı kárxanalarında strategiyalıq basqarıw esabı hámde analizdiń ilimiy-metodikalıq tiykarların jetilistiriw boyınsha ilimiy izleniwler alıp barıw úlken áhmiyetke iye.
Bul monografiyanıń ilimiy jańalıǵı sonnan ibarat, salıgershilik klasterlerinde ózine túser baha hámde bahanıń qáliplesiwi haqqındaǵı maǵlıwmatlar menen támiyinlewshi, aktivler hám minnetlemelerdi bahalaw, keshiktirilgen salıqlar, berilgen subsidiyalar, rezervlerdi esapqa alıw imkaniyatın beretuǵın 1700- «Kalkulyaciyalanatuǵın strategiyalıq qárejetler»,
3000-“Kelesi dáwir qárejetleri hám keshiktirilgen strategiyalıq qárejetler”, 8860-“Maqsetli strategiyalıq finanslastırıw» sintetik schetlardı ashıw hámde kárxanalardıń esap siyasatına kirgiziw sıyaqlılar usınıs etilgen.
Sonıń menen birge salıgershilik fermer xojalıqlarında sap paydanıń ósiwine ónimniń jasaw cikli, sap túsim, jeke kapital hámde minnetlemeler faktorları tásiriniń 2025-jılǵa shekem prognozı islep shıǵılǵan.
Bul qollanbada izertlew nátiyjeleriniń ámeliy áhmiyeti berilgen usınıslardan xojalıq júrgiziwshi subektlerde strategiyalıq basqarıw esabı hámde analizin xalıq aralıq standartlarǵa islep shıǵıw hám ámelge asırıw tarawında innovaciyalıq hámde investiciyalıq biznes proektlerin islep shıǵıwda paydalanıw múmkin.
Jáne bir quwanarlı tárepi sonnan ibarat, “GlobeEdit” baspaxanası ónimleriniń xalıq aralıq kitap bazarında 80 000 kitap dúkanı hámde 3 000 nan artıq internet-magazinlerinen satıp alıw múmkin.
Dúnyanıń belgili baspaxanalarında shıǵarılgan bul monografiya sawdası boyınsha 30 procentlik shegirme usınıs etilgen. Bul bolsa mámleketimiz alımları tárepinen tayarlanǵan ilimiy qollanbalarǵa úlken qızıǵıwshılıq bar ekenligin bildiredi.
