Usı jıldın 20-aprel kúni Ózbekstan Respublikası Oliy Majlisi Senatı baslıǵı Tanzila Norboeva Berdaq atındaǵı Qaraqalpaq mámleketlik universitetinde boldı. Onda Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komiteti baslıǵı M.Axmedova universitet rektorı A.Reymov, Jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov hám rektordıń hayal-qızlar máseleleri boyınsha másláhátshisi, I.Seytnazarovalar qatnastı. Senat baslıǵı dáslep, Prezidentimiz tárepinen ilgeri súrilgen 5 áhmiyetli baslama tiykarında shólkemlestirilgen zamanagóy kompyuter xanaları, gimnastika zalları, málimleme resurs orayı, tigiw cexı, sonday-aq, basqada dógereklerdi kózden ótkerdi. Sonıń menen bir qatarda, hayal-qızlar bandligin támiyinlew hám olardıń bos waqıtların mazmunlı ótkeriw boyınsha shólkemlestirigen tigiw cexında islep atırǵan student qızlar menen sáwbetlesip, olardıń aldaǵı oqıwlarında tabıslar tiledi. Bunnan soń, universitetimiz jaslar awqamı janında dúzilgen volontyorlar menen ushırastı. Ushırasıw dawamında volontyorlardıń ámelge asırıp atırǵan joybarları haqqında sáwbetlesip, elde jańa joybarlar ústinde islew, sonday-aq, sabaqtan bos waqıtlarında qosımsha dógereklerge, til úyreniw kursları hám óner úyreniw kerek ekenligin aytıp óz pikir usınısların bildirdi.
QMU baspasóz xızmeti
