Jańa Ózbekstanda jańa Konstituciya- bul jańa innovaciya dep ayta alamız. Xalqımızdıń usınısı menen ózgertilip atırǵan Ózbekstan Respublikasınıń tiykarǵı nızamı Konstituciyanıń jańa joybarında Mámleketimizdiń rawajlanıwı ushın úlken itibar qaratılǵan. Xalqımızdıń erki hám qálewi menen, bir neshe unamlı ózgerisler kirgizilmekte. Bilimlendiriw, ilim-pán tarawına tiyisli kóplegen statyalar hám normalar qosılmaqta. Atap aytqanda, tiykarǵı nızamımız Konstituciyamızdıń jańa joybarınıń 50-statyasında: «Hár kim bilim alıw huqıqına iye» – dep kórsetilgen. 51-statyada: «Puqaralardıń joqarı oqıw orınlarında tańlaw tiykarında mámleketlik grant esabınan oqıw huqıqı belgilengen». Jańa Konstituciyanıń 52-statyasında: «Mámleket oqıtıwshılardıń qádir-qımbatın, ar-namısın, huqıqın qorǵaw, olardıń kásiplik rawajlanıwı boyınsha ǵamxorlıqtıń kúsheytiriliwi belgilengen», bul bolsa oqıtıwshılardıń abırayınıń jánede joqarı dárejede bolıwına xızmet qıladı, elede óz kásibin súyiwge, alǵa ilgerilewge sebepshi boladı. 77-statyasında: «Ata-analardıń juwapkershiligi kórsetilgen: perzent tárbiyası, olarǵa bilim beriw, kamalǵa keltiriw ata-ana májbúriyatı, al balanıń huqıqları, erkinlikleri, olardıń aqılıy hám fizikalıq tolıq rawajlanıwı ushın eń jaqsı sharayatlardı jaratıw, mámleket minneti etip belgilenbekte».
Hámmemizge belgili házirgi kúnde jaslarımızdıń tálim-tárbiya alıwı aktual máselelerdiń biri bolǵan. Konstituciyanıń jańa joybarınıń 79-statyasında: «Mámleketimizdiń keleshegi bolǵan jaslardıń jeke, siyasiy, ekonomikalıq, social, materiallıq, ekologiyalıq huqıqların qorǵaw hám olardıń mámleket hám jámiyettiń turmısında belsendi qatnasıwın qollap quwatlaydı hám xoshametleydi».
Mámleket jaslardıń intellektuallıq, dóretiwshilik, fizikalıq hám aqılıy tárepten qáliplesiwi hám de rawajlanıwı ushın, olardıń tálim alıwda, jumısqa jaylasıwda, bántlikke bolǵan huqıqların ámelge asırıw ushın shárayatlar jaratadı.
Mámleketimiz tárepinen student hayal-qızlarǵa úlken itibar qaratıp, olarǵa jeńillikler kelmekte. Atap aytqanda, hayal-qızlarǵa joqarı oqıw orınlarına kiriwde grant orınlarınıń ajıratılıp atırǵanlıǵı, student-qızlarǵa payızsız tálim kreditleriniń beriliwi, ótken jılda magistraturaga qabıllanǵan student-qızlardıń kontrakt pullarınıń tólep berilgenliginiń guwasımız. Sonday-aq, tiykarǵı nızamda Nágiranlıǵı bar balalarǵa óz teńlesleri menen bir qatarda teńdey bilim alıwı ushın barlıq shárayatlardı jaratıw kózde tutılıwı bul jańa Ózbekstanda insan qádiriniń bálent ekenliginen dárek beredi. Ańlaǵanımızday jańa Konstituciyamızǵa kirgizilip atırǵan hár qanday ózgeris insan qádiri, insan mápleri ushın xızmet etedi. Biz Shet tilleri fakulteti jámáátı ózgeris kirgizilip atırǵan Konstituciyamızǵa biyparıq emespiz. Sonlıqtan bársheni 30-aprel kúni bolıp ótetuǵın ulıwma xalıqlıq referendumda qatnasıwǵa shaqırıp qalamız. Konstituciya bárshemizdiki!
Ǵayrat Abdimuratov,
Shet tilleri fakulteti tyutorı
