Globallasıw dáwirinde planetamızdıń barlıq insanlarınıń is háreketlerin tábiyat nızamlarına tiykarlanıwın hám olarda jańasha kóz-qaras qáliplestiriwdi talap etpekte. Ekologiyalıq mashqalalardıń jaqın keleshektegi sheshimi insanlardıń jańa ideyalarına hám olardıń awız birshilik penen iske asırılıwına baylanıslı.

 Búgingi kúnde ekologiya hám qorshaǵan ortalıq qáwipsizligine tiyisli máseleler pútkil duńyada kún tártibindegi aktual máselelerden biri bolıp qalmaqta. Aral boyı aymaǵında júzege kelgen global ekologiyalıq mashqalalar respublika xalqınıń turmıs tárizine unamsız tásir kórsetpekte. Sol sebepli Respublikamızda Aral mashqalası aqıbetlerin saplastırıw, qorshaǵan ortalıqtı qorǵaw máselelerine mámleketimizde ayrıqsha itibar qaratılmaqta. Óytkeni, puqaralardıń múnásip qorshaǵan ortalıqqa bolǵan huqıqları támiyinlenbey turıp puqaralardıń salamatlıǵı hám sotsiallıq turaqlılıqtı támiyinlew imkansız bolıp tabıladı.

Jańa Ózbekstannıń jańalanıp atırǵan Konstituciyasınıń 49-statyasında bul normanıń belgileniwi jámiyetshilik qadaǵalawın keńeytiw arqalı xalıqımız hám keleshek áwlad ushın qolay hám ekologiyalıq taza aymaqtı saqlap qalıw,  Aral boyı aymaǵında jasawshı xalıqtı sotsial-ekonomikalıq qollap-quwatlaw, xalıqtıń salamatlıǵın isenimli qorǵaw, olardıń jasawı hám rawajlanıwı ushın qolay qorshaǵan-ortalıqtı támiyinlewdiń konstituciyalıq kepilliklerin kúsheytedi.

Jańa redaktsiyadaǵı Konstituciya Ózbekstan jámiyetshiliginiń evolyutsiyalıq rawajlanıwınan kelip shıǵıp atırǵan turmıslıq zárúrlik bolıp, bul mámleket, millet hám xalıq sıpatında keyingi qádemlerimizdi anıqlap alıwımız ushın oǵada áhmiyetli másele, ádil jámiyet qurıw jolındaǵı úlken qádem bolıp tabıladı. Eger ózińiz hám keleshek áwlad ushın qolay hám ekologiyalıq taza aymaqtı saqlap qalmaqshı bolsańız 30-aprel kúni bolıp ótetuǵın ulıwma xalıqlıq Referendumǵa belsene qatnasıwǵa shaqırıp qalaman.

Qaraqalpaq mámleketlik universiteti

Ekologiya hám topıraqtanıw kafedrası (DSc) doktorantı

b.i.k., dotsent F.T.Otenova