Búgin 3-may kúni Tashkent qalasındaǵı Dóretiwshiler baǵı»nda Berdaq atındaǵı Qaraqalpaq mámleketlik universiteti rektorı baslaması menen universitetimiz belsendi student-jasları tárepinen qaraqalpaq ádebiyatında óshpes iz qaldırǵan Qaraqalpaq xalqınıń kórnekli wakilleri Berdaq Ǵarǵabay ulı, Ájiniyaz Qosıbay ulı, Ibrayim Yusupov, Tólepbergen Qayıpbergenovlardıń ómir jolı hám dóretiwshilik shıǵarmalarınan tayarlanǵan «Sahro bulbullari nomini olgan adiblar» atamasında koncert baǵdarlaması bolıp ótti. Onda miymanlar, jazıwshılar, shayırlar hám student-jaslar qatnastı.
Dáslep, universitetimiz jámááti hám belsendi student-jasları qaraqalpaq ádebiyatına óz úlesin qosqan Berdaq Ǵarǵabay ulı, Tólepbergen Qayıpbergenov, Ibrayım Yusupov esteliklerine gúller qoyıp, olardıń islegen qayırlı isleri hám keleshek áwladqa qaldırǵan biybaha ádebiy miyrasları yadqa alındı. Bunnan soń, universitet jámááti tárepinen tayarlanǵan Sahro bulbullari nomini olgan adiblar» atamasında koncert baǵdarlaması jıynalǵanlar názerine usınıldı.
Ilajda Berdaq atındaǵı Qaraqalpaq mámleketlik universitetiniń Jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov sózge shıǵıp, ilaj qatnasıwshılarına qaraqalpaq klassikalıq ádebiyatınıń tiykarshıları Berdaq Ǵarǵabay ulı, Ájiniyaz Qosıbay ulı, Ibrayim Yusupov, Tólepbergen Qayıpbergenovlardıń, dóretiwshilik jolları, biybaha ádebiy miyrasları, olardıń ádebiyatımız rawajlanıwına qosqan úlesleri haqqında jıynalǵanlarǵa keń túrde maǵlıwmatlar berdi. «Dóretiwshiler baǵı»nda universitettiń talantlı student-jasları tárepinen qosıq-namalar, ayaq oyınları, milliy qol óneri dóretpeleri, xudojnikler kórgizbesi, hám «Hurliman» xalıq ansambli tárepinen ullı babalarımızdıń ómir jolları hám dóretiwshilikleri boyınsha tayarlanǵan muzıkalı-saxnalıq kórnisleri jıynalǵanlarǵa ózgesh zawıq baǵıshladı.
Bunday ilajdı ótkeriwdegi tiykarǵı maqset – keleshek áwladtı Ana-Watanǵa, xalıqqa, muhabbat hám sadıqlıq ruwxında tárbiyalaw, tuwısqan xalıqlar arasında doslıq qarım-qatnasların rawajlandırıw hám ósip kiyatırǵan jaslarǵa ullı babalarımızdıń ádebiy miyrasların túsindiriw, olardıń dóretiwshiliklerin xalqımız arasında jánede keńnen úgit-násiyatlaw bolıp tabıladı – deydi universitet jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov.
QMU baspasóz xızmeti
