Usı jıldıń 19-may kúni Qaraqalpaq mámleketlik universiteti Hayal-qızlar  másláhát keńesi baslaması  menen student qızlar hám professor- oqıtıwshı  hayal-qızlar arasında xalqımızdıń eski,  umıtılıp baratırǵan  milliy sport oyınların jaslarımız arasında ásirese student qızlarımız arasında keńnen en jaydırıw, úgit-násiyatlaw maqsetinde «Hayal-qızlar salamatlıǵın bekkemlewde hám student qızlar tárbiyasında  milliy sport   oyınlarınıń áhmiyeti»  atamasında milliy sport  festivalı  ótkerildi.
Bul sport  festivalı sheńberinde ótkerilgen milliy sport oyınları jarısında fakultetlerden qatnasqan student qızlar bir-biri menen milliy oyınlarımızdan bolǵan «Arqan tartısıw», «Aq terekpe, kók terek» «Qasharman»,, «Mańlayǵa shertpek»,  «Teppek» , «Bektash» , «Ortaǵa túspek» , «Sekirmek»  h.t.b. oyınlardı birgelikte oynap ózara bellesti hám waqıtların júdá  mazmunlı ótkerdi. Ayırım student  qızlarımız «Qasharman top» oyınını haqqında  bilmese, ayırım student qızlarımızdıń «Uldur-shuldır men emes», yamasa «Mańlayǵa shertpek» oyınlarınan xabarsız ekenligi belgili boldı hám oyınlardı oynaw barısında bul oyınlardı oynap  úyrengenligin bildirdi.  Sonday-aq, bul oyınlardıń basqa da  túrleri, atqaratuǵın xızmeti,  mánisi hám adam densawlıǵına paydası haqqında universitettin Dene mádeniyatı fakulteti,  «Dene tárbiyası kafedrası» professor-oqıtıwshıları  hám de «Sport klubı»  qánigeleri tárepinen hayal-qızlarǵa  túsinikler berip ótildi. Milliy xalıq  oyınları sport  festivalı  sheńberinde ótkerilgen  sport jarıslarına barlıq fakultetlerdiń hayal-qızlar máseleleri boyınsha  dekan másláhátshileri hám de barlıq fakultetlerdiń  student qızları júdá qızıǵıwshılıq hám belsendilik penen qatnastı.
Festival sońında  milliy xalıq sport oyınları boyınsha  ótkerilgen jarıslarda jeńimpaz bolǵan student qızlar hám professor-oqıtıwshı hayal-qızlar  universitet rektoratı, Hayal-qızlar másláhát keńesi tárepinen «Diplom», «Húrmet jarlıǵı» hám de sawǵalar menen sıylıqlandı.

QMU Hayal-qızlar keńesi