Ilim – imkaniyatlar bar jerde ǵana óz jemisin beredi. Bul jolda Qaraqalpaq mámleketlik universiteti bir qatar múmkinshilikler jaratıp kelmekte. Solar qatarında sırt eller menen birge islesiwdi mısal keltiriwimiz múmkin.Usı jıldıń aprel ayınan baslap Qaraqalpaq mámleketlik universiteti “Sanaat texnologiyası” kafedrası docenti Ǵ.Allaniyazov Vitebsk mámleketlik texnika universitetinde ilimiy stajirovkada bolmaqta. Ilimiy stajirovkanıń tiykarǵı maqseti Belarus Respublikasınıń tájriybesin úyreniw, ilimiy laboratoriya úskenelerinde islew, jańa ilim izertlew jumısları menen tanısıw hám birge islesiwdi jolǵa qoyıw bolıp esaplanadı. Sonıń menen bir qatarda ol Qaraqalpaq mámleketlik universiteti hám Vitebsk mámleketlik texnika universiteti menen «2+2 Qospa tálim» tiykarında Sanaat texnologiyası fakultetinen Vitebsk qalasında oqıp atırǵan studentlerdiń jaǵdayınan xabar aldı, oqıw barısı hám jasaw sharayatların úyrendi. Sırt el joqarı oqıw orınları menen birge islesiw tek ǵana tájiriybe bolıp ǵana qoymastan, jańa oylap tabıwlarǵa tiykar wazıypasın atqaradı.
