Ózbekstan Respublikası Ministrler Kabinetiniń 2022-jıl 18-yanvardaǵı “Qábiletli jaslardı qollap-quwatlaw “Uluǵbek” fondı xızmetin rawajlandırıw is-ilajları haqqında”ǵı 30-sanlı qararınıń orınlanıwın támiyinlew maqsetinde 2023-jıldıń mart-aprel aylarında «Mırza Ulıǵbek áwladları» tańlawınıń Qaraqalpaqstan Respublikası basqıshı ótkerilgen edi. Tańlaw juwmaǵına jeńimpazlar arasınan universitettiń 3 studenti de (D.Qallibekova, A.Usmanova, X.Shamuratova) orın alǵan bolıp, olar tańlawdıń Tashkent qalasında ótkeriletuǵın juwmaqlawshı respublikalıq basqıshına jollanba alǵan edi.

Usı jıldıń 22-24-may kúnlerinde «Mırza Ulıǵbek áwladları» tańlawınıń eń sońǵı Respublika basqıshı Tashkent qalasında bolıp ótti. Bunda respublikamızdıń túrli aymaqlarınan 280 ziyrek studentler hám qábiletli jaslar ózleriniń innovaciyalıq joybarları menen qatnastı. Tańlaw juwmaǵına kóre, universitetimizdiń Qaraqalpaq filologiyası hám jurnalistikası fakulteti 2-basqısh studenti hám “Uni” volontyorlar associaciyası koordinatorı Qallibekova Dinora Aybek qızı tańlawdıń Respublika basqıshı jeńimpazı boldı hám bazalıq esaplaw muǵdarınıń 20 esesi muǵdarında pul sıylıǵı menen sıylıqlandı hám shólkemlestiriletuǵın maqsetli oqıw kurslarında biypul oqıw imkaniyatına iye boldı. Qallibekova Dinora Aybek qızın universitet jámááti atınan erisken jetiskenligi menen shın kewilden qutlıqlaymız!