Búgin 24-may kúni Franciyanıń Ózbekstandaǵı ayrıqsha hám tolıq huqıqlı elshisi Orelia Bushez Qaraqalpaqstan Respublikasına saparı dawamında, Qaraqalpaq mámleket universitetinde boldı.

Dáslep, miymanlardı universitet rektorı A.Reymov kútip alıp, universitetimizdiń oqıw procesi hám jańadan qurılısı alıp barılıp atırǵan 1800 orınǵa mólsherlengen oqıw laboratoriyasınıń maketi, ol jerde studentler ushın jaratılatuǵın qolaylıqlar haqqında tanıstırıp ótti. Bunnan soń, miymanlar menen dóńgelek stol átirapında sáwbetlesip, universitetimizde aldagı waqıtları studentler ortasında francuz tilin úyretiwdi keńeytiw maqsetinde, til úyretiw orayın shólkemlestiriw hám Franciyanıń xalıq aralıq reytinglerge kirgen joqarı oqıw orınları menen tálim baǵdarları, túrli qánigelikler boyınsha ilimiy-izertlew iskerligin rawajlandırıw, sonday-aq, studentlerdiń akademikalıq almasıwı, sonıń menen birge, professor–oqıtıwshılardıń tájiriybe almasıwın jolǵa qoyıw, francuz tilin úyreneip atırǵan student-jaslardıń jazǵı ámeliyatın Franciya mámleketindegi joqarı oqıw ornılarında alıp barıwın shólkemlestiriw máseleleri haqqında óz-ara kelisiwler alıp barıldı.

Sáwbetlesiw barısında, házirde xalıq aralıq global mashqalaǵa aynalǵan Aral teńiziniń qurıwı aqıbetlerinde júzege kelgen ekologiyalıq mashqalalardıń aldın alıw, olardıń unamsız aqıbetlerin saplastırıw máseleleri boyınsha birge islesiw joybarlar ústinde ilimiy izertlewler alıp barıw maqsetinde, Franciyanıń bul tarawdaǵı jetekshi joqarı oqıw orınları, mámleketlik hám mámleketlik emes shólkemleri menen aldaǵı waqıtları birgelikte ilimiy jumıslardı jolǵa qoyıw boyınsha birge islesiw usınısların bildirildi. Ushırasıw dawamında universitetimizdiń Shet tilleri fakutltetinde student-jaslar ushın shólkemlestirilgen Amerika, Ullı Britaniya, Koreys til oraylarınıń jumıs iskerligi menen tanısıp student-jaslar menen pikirlesti.

QMU baspasóz xızmeti