Búgin Berdaq atındaǵı Qaraqalpaq mámleketlik universitetinde jaslar aylıǵı múnásibeti menen “Biz bir shańaraq perzentlerimiz! atamasında festival bolıp ótti. Onda Ózbekstan Respublikası Joqarı bilimlendiriw, ilim hám innovaciyalar ministrligi Qaraqalpaqstan aymaqlıq basqarmasınıń baslıǵı N.Kayupov universitetimiz rektorı A.Reymov, barlıq prorektorlar, fakultet dekanları hám student-jaslar qatnastı.
Dáslep, festivaldı Qaraqalpaq mámleketlik universiteti rektorı A.Reymov ashıp berdi hám bárshe student-jaslardı bayram menen qutlıqladı. Ol óz sózinde búgingi kúnde universitetimizde 16 dan aslam túrli millet wákilleri bir shańaraq prezentlerindey bolıp, teń huquqlı hám óz-ara awızbirshilikte oqıp, bilim alıp atırǵanlıǵı, sonday-aq, olardıń huqıq hám erkinlikleri, nızamlı máplerin támiyinlew, bilim alıwı, kásip-óner úyreniwi, mádentiyatları, úrip-ádet dástúrlerin saqlaw hám rawajlandırıw ushın mámleketimiz tárepinen barlıq shárayatlar jaratılıp berilgenligin aytıp ótti.
Bunnnan soń, Joqarı bilimlendiriw, ilim hám innovaciyalar ministrligi Qaraqalpaqstan aymaqlıq basqarmasınıń baslıǵı N.Kayupov sózge shıǵıp, Húrmetli Prezidentimizdiń mámleketimizde bilimlendiriw tarawına bolǵan ayrıqsha itibarı, student-jaslardıń joqarı bilim alıwları ushın kórsetip atırǵan ǵamxorlıǵı, sonday-aq, jámiyetimizde oqıp bilim alaman degen jaslarǵa keń múmkinshilikler jaratılıp berilgenligin aytıp, barlıq student-jaslardı 30-iyun jaslar kúni menen qızǵın qutlıqladı.
Sonıń menen birge, miymanlar festival sheńberinde ótkerilgen tańlawlar, sport jarısları, jas xudojniklerdiń kórgizbesin tamashalap, student-jaslar menen birgelikte tańlaw qatnasıwshısına aylandı. Ótkerilgen festivalda student-jaslar psixologiyalıq treningler, jas xudojniklerdiń kórgizbesi, hár túrli sáz áspablarınan sheberlik sabaqları, sport jarısları (basketbol, valeybol hám badminton), “Karaoke party”, “Flashmob” doslıq ayaq oyınlarında belsene qatnastı. Festival universitetimizdiń Kórkem óner fakultetiniń talantlı student-jasları tórepinen tayarlanǵan koncert baǵdarlaması, jaslar ushın diskoteka, hám mádeniy ilajlar menen dawam etti.
Haqıyqatında da mámleketimizde milletlerara tatıwlıq hám diniy kenpeyillik principleri qarar taptırıw, milletlerdiń hár tárepleme rawajlanıwı, olardıń milliy qádiryatların saqalap qalıw, úrip-ádet dástúrlerin rawajlanıwına mámleketimizde barlıq imkaniyatlar jaratılǵan bolıp bul óz gezeginde kóp milletli xalqımızdıń milletler aralıq taıwlıqtı bekkemlew Ana-Watanımızdıń elde gúllep jasnawına xızmet qıladı.
QMU baspasóz xızmeti
