Ózbekstan Respublikası Prezidentiniń usı jıl 16-fevral kúngi “2023 jılda qayta tikleniwshi energiya dereklerin hám energiya únemlewshi texnologiyalardı engiziwdi jedellestiriw is-ilajları haqqında”ǵı PQ-57-sanlı qarar tiykarında Berdaq atındaǵı Qaraqalpaq mámleketlik universiteti barlıq ımaratlarında qayta tikleniwshi energiya dereklerin keń engiziw boyınsha bir qatar jumıslar alıp barılmaqta. Búgin alternativ energiya dereklerin ornatıw boyınsha ámelge asırılǵan jumıslar menen tanısıw maqsetinde Ózbekstan Respublikası Oliy majlis Senatınıń Aralboyı regionın rawajlandırıw máseleleri hám ekologiya komiteti baslıǵı B.Alixanov, Oliy majlis Senatı aǵzası, B.Matmuratov, Oliy Majlis Nızamshılıq palatası deputatı L.Seytovalar Berdaq atındaǵı Qaraqalpaq mámleketlik universitetinde boldı.
Bul jerde elektr energiya menen támiyinleytuǵın quyash panellerin ornatıw jumısları, aldaǵı waqıtları qansha kvt quwatqa iye bolǵan panellerdi jaylastırıw múmkinshiligi, sonday-aq, ornatılıwı múmkin bolǵan quyash panelleri arqalı energiya derekleriniń qansha bólegin qaplawı boyınsha sáwbetlesiw alıp barıldı. Sáwbetlesiw barısında universitet rektorı A.Reymov Qaraqalpaq mámleketlik universiteti fakultetleriniń oqıw imaratlarında jataqxanalarda qayta tikleniwshi energiya dereklerin ornatıw boyınsha prezentaciya isledi hám házirgi waqıtta universitette laboratoriya hám jataqxanalardaǵı ısıtıw úskeneleri ushın islep turǵan quyash panelleri menen tanıstırdı.
Maǵlıwmat ornında búgingi kúnde, Berdaq atındaǵı Qaraqalpaq mámleketlik universitetine jámi talap etiletuǵın elektr energiyası 1960,0 mıń kVt/2000 = 980 kVt quraydı.
