Búgingi kúnde basqa sırt el joqarı oqıw orınları qatarında Turkiya mámleketiniń Ege universiteti hám Qaraqalpaq mámleketlik universiteti ortasında ilim hám bilimlendiriw salasındaǵı óz-ara baylanıslar keńeyip barmaqta. Usı tiykarda 2023-jıldıń 10-15-iyun kúnleri Qaraqalpaq mámleketlik universitetiniń ilimiy isler hám innovaciyalar boyınsha prorektorı Izimbet Turdımambetov basshılıǵındaǵı bir topar delegaciya aǵzaları Turkiyanıń Izmir qalasındaǵı Ege universitetinde ilimiy saparda bolıp qayttı.

Bul ilimiy sapardan gózlengen tiykarǵı maqset 2022-jılda Qaraqalpaq mámleketlik universiteti hám Ege universiteti ortasında rektorları tárepinen dúzilgen óz-ara birge islesiw memorandumı tiykarında birgeliktegi ilimiy izertlew baǵdarındaǵı perspektivalıq is-ilajlardı ámelge asırıw hám bul boyınsha shólkemlestiriw jumısların jolǵa qoyıw, usı arqalı eki joqarı oqıw ornı ortasındaǵı baylanıslardı elede rawajlandırıw bolıp esaplanadı.

Sonıń menen birge, universitettiń delegaciya aǵzaları 2023-jıldıń 12-13 iyun kúnleri Ege universitetinde bolıp ótken «Innovacion texnologiyalar hám injenerlik boyınsha 2 shi xalıqaralıq kongress» ilajında da qatnastı. Ilimiy sapar dawamında universitet prorektorı I.Turdımambetov Ege universiteti prorektorları Mehmet Ersan hám Banu Yudjel hám usı joqarı oqıw ornınıń xalıq aralıq baylanıslar boyınsha koordinator orınbasarı Pınar Fedakarlar menen óz-ara sáwbetlesiwde bolıp, usı eki universitet arasında magistraturanıń ayırım qánigelikleri boyınsha qospa tálim dástúrin ashıw haqqında hám bunnan basqa da bir qatar qospa ilimiy joybarlardı birgelikte ámelge asırıw boyınsha, atap aytqanda, geografiya, matematika, biologiya, fizika hám elektr energetika tarawları boyınsha Ege universitetiniń professor-oqıtıwshıları menen sáwbetlesip, aldaǵı jumıslarda birge ilimiy joybarlar islep shıǵıw hámde olardı orınlaw boyınsha kelisimlerge erisildi.