Búgin, Berdaq atındaǵı Qaraqalpaq mámleketlik universitetinde Ózbekstan Qaharmanı, professor Ǵayratdin Xojaniyazovtıń 75 jıllıq yubileyi múnásibeti menen “Ilim ziya taratqan ilimpaz” atamasında ushırasıw keshesi bolıp ótti. Onda Ǵ.Xojaniyazovtıń shańaraq aǵzaları, ilimpazlar, professor-oqıtıwshılar, student-jaslar hám ǵalaba xabar qurallarınıń wákilleri qatnastı. Ushırasıwdı universitetimizdiń rektorı A.Reymov ashıp berdi hám alıp bardı. Ol óz sozinde Ilim hám bilimlendiriw tarawında ilimge óziniń pútkil ómirin arnaǵan, Xalqımızdıń ótmishten búgingi kúnge shekem saqlanıp kelgen biybaha tariyxıy esteliklerin saqlawda pidaylıq etken insan Ózbekstan Qaharmanı, professor Ǵ.Xojaniyazovtıń miynetlerin ayrıqsha maqtanısh penen atap otti.

Bunnan soń, «Ǵ.Xojaniyazov-úlkemiz tariyxın izertlewshi hám úgit násiyatlawshı», «Qubla Aral boyı esteliklerin izertlewde Ǵ.Xojaniyazovtıń xızmetleri», «Ǵayratdin Xojaniyazovtıń shet ellik alımlar menen birge islesiw nátiyjeleri» sonday-aq, «El xızmetinde húrmetke erisken ilimpaz Qaharman» temalarında ustazdıń kásiplesleri shákirtleri bayanat isledi.

Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. Usı orında Aralboyı arxeologiyasın jáhánge tanıtqan belgili alım, mehriban ustaz, kemtar insan Ǵ.Xojaniyazovtıń talapshańlıǵı, óz kásibine bolǵan pidayılıǵı, onıń islegen qayırlı isleri, biziń qálbimizde máńgi saqlanıp qaladı.

QMU baspasóz xızmeti