Ilimiy izertlew baǵdarındaǵı alıp barılıp atırǵan jumıslar, sonday-aq, bul baǵdarda birge islesiwdi jol qoyıw maqsetinde Ózbekstan Respublikası Qurallı Kúshler áskeriy miyraslar hám zamanagóy ilim izertlew institutı baslıǵı, general leytenant Shovkat Normatov Berdaq atındaǵı Qaraqalpaq mámleketlik universitetinde boldı. Dáslep universitet rektorı Axmed Reymov miymandı kútip alıp, bul jerde jańa 1800 orınǵa mólsherlengen oqıw loboratoriyasınıń maketi menen tanıstırıp, qurılısı juwmaqlanǵannan soń, bul oqıw laboratoriyası professor-oqıtıwshılar hám jas alımlardıń ilim izertlewi ushın áhmiyeti haqqında aytıp, óz-ara sáwbetlesiwler alıp bardı.
Sáwbetlesiw dawamında rektor A.Reymov búgingi kúnde universitette tálim-tárbiya hám ilimiy izertelew boyınsha ámelge asırılıp atırǵan jumıslar, atap aytqanda, házirgi waqıtta universitette oqıp atırǵan studentlerdiń úlesi, ekonomikanıń jetekshi tarawları ushın joqarı maman qánigeler tayarlaw hám olardıń jumıs penen bandligi, universitettiń ÓzR hám sırt el joqarı oqıw orınları hám ilimiy izertlew mákemeleri menen birgelikte jumıs alıp barıwı, xalıq aralıq hám milliy reytinglerdegi ornı haqqında tolıq tanıstırıp ótti.
Bunnan soń, Ózbekstan Respublikası Qurallı Kúshler áskeriy miyraslar hám zamanagóy ilim izertlew institutı hám Berdaq atındaǵı Qaraqalpaq mámleketlik universiteti arasında aladaǵı waqıtları birgelikte ilimiy izertlew baǵdarındaǵı perspektivalıq is-ilajlardı ámelge asırıw boyınsha kelisip alındı.
