Búgin, Berdaq atındaǵı Qaraqalpaq mámleketlik universitetinde «Arxeologiya» kafedrası baslıǵı, tariyx ilimleriniń kandidatı, docent Jolmurza Hakimniyazovtıń 60 jıllıq yubileyi múnásibeti menen ushırasıw keshesi bolıp ótti. Onda J.Hakimniyazovtıń shańaraq aǵzaları, ilimpazlar, professor-oqıtıwshılar hám ǵalaba xabar qurallarınıń wákilleri qatnastı.

Ushırasıwdı universitetimiz jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov ashıp berdi hám alıp bardı. Ol óz sozinde xalqımızdıń ótmishten búgingi kúnge shekem saqlanıp kelgen biybaha tariyxıy esteliklerdiń saqlanıwında álbette pidayı arxeolog alım J.Hakimniyazovtıń miynetlerin ayrıqsha maqtanısh penen atap otti.

Bunnan soń, J.Hakimniyazovtıń ómir jolı hám ustazlıq xızmetleri, adminstrativlik hám jámiyetlik jumısları haqqında, sonday-aq, arxeologiya ilimindegi xızmetleri boyınsha óz kásiplesleri, shákirtleri bayanat jasadı.

Haqıyqatında da Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. Usı orında Qaraqalpaqstannıń materiallıq mádeniyatı, biybaha arxeologiyalıq obektlerin saqlawda harmay-talmay miynet etip atırǵan, milliy mádeniyatımızdıń pidayısı- arxeolog alım Jolmurza Hakimniyazovtıń ilimiy izertlewlerdegi mártlik hám mánawiy xızmetleri keleshek jaslarǵa úlgi hám maqtanısh boladı. Bizde óz gezeginde universitet jámááti ustazdıń aladaǵı jumıslarında tasqın tabıslar tileymiz.

QMU baspasóz xızmeti