Usı jıldıń 7-sentyabr kúni Polessk mámleket universitetinde universitet rektorı Valeriy Ivanovich Dunay Berdaq atındaǵı Qaraqalpaq mámleketlik universiteti rektorı, texnika ilimleri doktorı Reymov Axmed Mambetkarimovichke «Húrmetli professorı» ataǵı berilgenligi haqqındaǵı diplomdı saltanatlı túrde tapsırdı.

Saltanatlı ilajda joqarı oqıw ornınıń professor-oqıtıwshıları hám student-jasları, Polessk mámleket universitetinde oqıp atırǵan Qaraqalpaqstanlı student-jaslarda qatnastı.Maǵlıwmat ushın Berdaq atındaǵı Qaraqalpaq mámleketlik universiteti wákilleriniń Polessk mámleketlik universitetine dáslepki rásmiy saparı 2021-jıl 18-may kúni bolıp ótken edi. Onda eki oqıw ornı arasında birge islesiwdi elde rawajlandırıw boyınsha kelisilip, házirde bul joybarlar ámeliyatqa tolıq engizilgen.

Saltanatlı ilaj juwmaǵında Axmed Mambetkarimovich «Polessk mámleket universitetiniń húrmetli professorı» ataǵın berip atırǵanı hám bunday úlken isenim ushın universitet rektorına, sonday-aq, jıynalǵanlarǵa óz minnetdarshılıǵın bildirip, aldaǵı waqıtları eki oqıw ornı arasında tájiriybe almasıw hám óz-ara birge islesiwge tayar ekenin aytıp ótti.

Esletip ótemiz, bunnan eki jıl aldın Belarussiya mámleketlik texnologiya universiteti menen birge islesiwdi úzliksiz alıp barıp atırǵanlıǵı hám bul boyınsha óz-ara jaqsı nátiyjelerge erisip kiyatırǵanlıǵı, sonday-aq, ilim hám bilimlendiriw salasında Ózbekstan-Belarus sherikligin rawajlandırıwǵa qosqan úlesi ushın Belorussiya mámleketlik texnologiya universiteti tárepinen «Belorussiya mámleketlik texnologiya universiteti rawajlanıwına qosqan xızmetleri ushın» medalı menen sıylıqlanǵan edi.

Bizde óz gezeginde, Berdaq atındaǵı Qaraqalpaq mámleketlik universiteti jámááti Reymov Axmed Mambetkarimovichti jetiskenligi menen qutlıqlap, aldaǵı jumıslarında tabıslar tileymiz.

QMU baspasóz xızmeti