Búgin Berdaq atındaǵı Qaraqalpaq mámleketlik universitetinde gúz-qıs máwsimine tayarlıq kóriw ilajlarına baǵıshlanǵan ushırasıw bolıp ótti. Onda Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, “Hududgaztaminot” akcionerlik jámiyetiniń Qaraqalpaqstan filialı direktorı X.Aymanov, Qaraqalpaqstan Respublikası Ayrıqsha jaǵdaylar basqarması baslıǵı orınbasarı B.Orazbaev, sonday-aq, Nókis qalasındaǵı barlıq joqarı oqıw orınlarınıń rektorları, fakultet dekanları, tyutorlar hám taraw qánigeleri qatnastı. Dáslep Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, sózge shıǵıp, gúz-qıs máwsimine tayarlıq dárejesin kórip shıǵıw, gaz iyisinen záhárleniw aqıbetinde kelip shıǵatuǵın kewilsiz jaǵdaylardıń aldın alıw, bul baǵdarda anıqlanǵan kemshiliklerdi óz waqtında saplastırıw kerekligin aytıp ótti.

Bunnan soń, sózge shıqqanlar júz beriwi múmkin bolǵan ayrıqsha jaǵdaylar sonday-aq, puqaralardıń iyis gazinen záhárleniw, hawa-gaz aralaspasınıń jarılıwı hám órtler menen baylanıslı baxıtsız hádiyselerdiń aldın alıwǵa qaratılǵan jumıslardı jánede kúsheyttiriw, kóp-qabatlı uylerde ijarada jasaytuǵın student-jaslardıń úyindegi morılardı tazalatıw, jılıtıw úskenelerin texnika qáwipsizligine ámel etken halda paydalanıw kerekligin aytıp ótti. Ilaj dawamında ushırasıw qatnasıwshılarına taraw qánigeleri tárepinen texnikalıq qáwipsizlik qaǵıydalarına ámel etiw, iyis gazden záhárleniw hám órttiń aldın alıw menen baylanıslı bolǵan tarqatpa materialları tarqatıldı.

QMU baspasóz xızmeti