Búgin Berdaq atındaǵı Qaraqalpaq mámleketlik universitetinde gúz-qıs máwsimine tayarlıq kóriw ilajlarına baǵıshlanǵan ushırasıw bolıp ótti. Onda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, “Hududgaztaminot” akcionerlik jámiyetiniń Qaraqalpaqstan filialı direktorı X.Aymanov, Nókis qalalıq Ayrıqsha jaǵdaylar bólim baslıǵı J.Djubanishov sonday-aq, Nókis qalasındaǵı barlıq joqarı oqıw orınlarınıń rektorları, fakultet dekanları, tyutorlar,  MPJ baslıqları hám taraw qánigeleri qatnastı.

Ilajda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev sózge shıǵıp , júz beriwi múmkin bolǵan ayrıqsha jaǵdaylar sonday-aq, puqaralardıń iyis gazinen záhárleniw, hawa-gaz aralaspasınıń jarılıwı hám órtler menen baylanıslı baxıtsız hádiyselerdiń aldın alıwǵa qaratılǵan jumıslardı jánede kúsheyttiriw, kóp-qabatlı uylerde ijarada jasaytuǵın student-jaslardıń úyindegi morılardı tazalatıw, jılıtıw úskenelerin texnika qáwipsizligine ámel etken halda paydalanıw kerekligin aytıp ótti. Bunnan soń, taraw qánigeleri sózge shıǵıp, hawa rayınıń keskin dárejede suwıtıwı aldınan jılıtıw qazanları hám pech morıların tazalatıw, morılardıń tıǵılıp qalıwı insánlardı záhárli gazden zıyanlanıwına yaki jıllılıq tarmaqlarında nasazlıqlardı keltirip shıǵarıwına sebepshi bolıwı múmkin ekenligin aytıp, bársheni qıraǵılıqqa  shaqırdı.