Aldın xabar bergenimizdey búgin Berdaq atındaǵı Qaraqalpaq mámleketlik universitetide «Qaraqalpaqstanda repressiya dáwiri tariyxınıń úyreniliwi; izertlewler, jetiskenlikler hám mashqalalar» atamasındaǵı respublika ilimiy-ámeliy konferenciyası bolıp ótti. Onda Ózbekstan Respublikası Ministrler Kabineti janındaǵı repressiya qurbanların eslew mámleketlik muzeyi direktorı B.Hasanov, Qaraqalpaqstan Respublikası Joqarǵı Keńesi komitet baslıǵı, Sh.Otemisov, sonday-aq, respublikamızdaǵı joqarı oqıw orınlarınan hám ilimiy izertlew institutlarınan professor-oqıtıwshılar, ilimpazlar ózleriniń ilimiy maqalaları menen qatnastı. Konferenciyanı universitet jaslar máseleleri hám ruwxıy-aǵartıwshılıq isleri boyınsha prorektor S.Alawatdinov kiris sóz benen ashtı hám alıp bardı.
Konferenciyada sózge shıqqanlar Húrmetli Prezidentimizdiń 2020-jıl 8-oktyabrdegi F-5598-sanlı “Repressiya qurbanları miyrasın jáne de tereń úyreniw hám olardıń atın máńgilestiriw” tiyisli qosımsha is-ilajlar haqqındaǵı biyligi qabıl etilip, biylik wazıypalarınıń orınlanıwın támiyinlew, repressiya qurbanların atpa-at anıqlaw ushın ilimiy izertlewler alıp baratuǵın qánigelerge búgingi kúnde qolaylı shárayatlar jaratılıp berilgenligin ayrıqsha atap ótti.
Bunnan soń, sózge shıqqanlar «Qaraqalpaqstanda repressiya dáwiri tariyxınıń úyreniliwi; izertlewler, jetiskenlikler hám mashqalalar» atamasındaǵı respublikalıq konferenciyanıń maqseti hám wazıpaları, sonday-aq, muzey ekspoziciyasına eksponatlar jıynaw máseleri boyınsha ámeliy usınıslardı alıw, jazıqsız qurban bolǵan Qaraqalpaqstanlı mámleketlik ǵayratkerler, ruwxıy aǵartıwshılıq jolında pidayılıq kórsetken xalqımız perzentleriniń atların máńgilestiriw maqsetinde 1938-jıl 13-oktyabr qaraqalpaq ziyalıları qurban bolǵan tariyxıy sáneni, jánede muzeyde islenip atırǵan jumıslardı keń túrde úgit-násiyat etiw baslı maqset ekenligin aytıp ótti.
QMU baspasóz xızmeti
