Búgin 18-noyabr kúni Berdaq atındaǵı Qaraqalpaq mámleketlik universitetinde “Qaraqalpaq hám Ózbek tiliniń túsindirme sózligi” kitabınıń mazmun-mánisin túsindiriw boyınsha seminar ushırasıwı bolıp ótti. Onda Ózbekstan Respublikası Ministrler Kabineti janındaǵı Ózbek tilin rawajlandırıw fondı direktorı A.Eminov, A.Nawayı atındaǵı Tashkent mámleketlik Ózbek tili hám ádebiyatı universiteti janındaǵı mámleketlik tilde is júritiw tiykarlarn oqıtıw hám tájiriybelerin asırıw orayı direktorı I.Azimov, NMPI Qaraqalpaq til bilimi kafedrasınıń docenti, filologiya ilimleriniń doktorı A.Pirniyazova hám professor-oqıtıwshılar, student-jaslar qatnastı. Ushırasıwdı universitettiń Jaslar máseleleri hám ruwxıy–aǵartıwshılıq isleri boyınsha prorektorı S.Alawatdinov basqarıp bardı.

Seminarda sózge shıqqanlar til janlı organizm sıyaqlı bárqulla rawajlanıp hám bayıp baratuǵınlıǵı, tildiń rawajlanıw barısında onıń sózlik quramı basqa tarawlarǵa salıstırǵanda tez, sezilerli hám úlken ózgerislerge ushırawı haqqında aytıp, bul jańa “Qaraqalpaq hám Ózbek tiliniń túsindirme sózligi” kitabı boyınsha ózleriniń pikir-usınısların bildirdi. Ushırasıwda student-jaslar ózleriniń qızıqtırǵan sorawlarına qánigelerden tiyisli juwaplar aldı.