Berdaq atındaǵı Qaraqalpaq ádebiyatı tariyxı mámleketlik muzeyinde  Berdaq atındaǵı Qaraqalpaq mámleketlik universiteti fizika kafedrasınıń docenti, fizika-matematika ilimleriniń kandidatı B.Jollıbekovtıń «Ámiwdáryaǵa ilimiy ekspediciya-1874» atlı kitabınıń prezentaciyasına arnalǵan «Elimizdiń ertedegi tariyxınan dárekler» atamasında keshe ótkerildi.

Keshege respublikamızdaǵı joqarı oqıw orınlarınıń professor-oqıtıwshıları, ilimpazlar, shayır hám jazıwshılar, student-jaslar qatnastı. B.Jollıbekovtıń bul miynetinde 1874-jılı Imperatorlıq Rus geografiyalıq jámiyeti tárepinen shólkemlestirgen Ámiwdárya ilimiy ekspediciyası hám bunnan 150 jıl aldın 1873-jılǵı Rossiya imperiyasınıń Xiywa xanlıǵına áskeriy júrisi haqqında sóz etiledi. Usı ekspediciyada bir jıl dawamında jerlerdiń kartaları sızılǵan, qalalardıń, elatlı punktlerdiń koordinatları anıqlanǵan, ósimlikler hám haywanatlar dúnyası, teńiz, dáryalar, jer ústi hám jer astı baylıqları úyrenilgen.

Kitaptan XIX ásirdiń ekinshi yarımındaǵı elimizdiń tariyxına tiyisli kóplegen faktlerdi tabıwǵa boladı. Ilajda qatnasıwshılar kitap haqqında pikirlerin bildirip, ol xalqımızdıń sol dáwirlerdegi tariyxın úyreniwde dárek sıpatındaǵı áhmiyetin ayrıqsha atap ótti. Qatnasıwshılar ilimpazdan ózlerin qızıqtırǵan sorawlarǵa juwap aldı.

Á.Jiyemuratov,

Qaraqalpaqstan xabar agentligi