Usı jıldıń 1-dekabr kúni Berdaq atındaǵı Qaraqalpaq mámleketlik universitetinde Yuridika fakulteti, Insan huqıqları, mámleketlik huqıq hám basqarıw kafedrası shólkemlestiriwinde Konstituciyamızdıń 31 jıllıǵına arnalǵan «Jańa Ózbekstan Konstituciyası – demokratiyalıq, huqıqıy, sociallıq hám dúnyalıq mámleket qurıwdıń áhmiyetli tiykarı» atamasında respublika ilimiy-ámeliy konferenciyası bolıp ótti. Onda Qaraqalpaqstan Respublikası Joqarǵı Keńesiniń Nızamlılıq, sud huqıq hám korrupciyaǵa qarsı gúresiw máseleleri komiteti baslıǵı Z.Reymova, Qaraqalpaqstan Respublikası prokurorınıń aǵa járdemshisi D.Elmuratov, Qaraqalpaqstan Respublikası sudı sudyası E.Óteniyazov, Qaraqalpaqstan Respublikası Ádillik ministri orınbasarı A.Prenov, Ózbekstan Respublikası «Milliy tiklanish» demokratiyalıq partiyası Qaraqalpaqstan Respublikası bólim baslıǵı T.Romanov, Yuridika ilimleri doktorı, professor E.Kutıbaevalar qatnastı. Konferenciyada sózge shıqqanlar hár bir mámlekettiń dúnya júzilik siyasiy maydanda mámleket sıpatında óz ornına iye bolıwında, óziniń rawajlanıw jolın belgilep alıwında, dúnyanıń rawajlanǵan mámleketler qatarınan orın alıwında Konstituciyanıń tutqan ornı ayrıqsha ekenligin sonıń menen birge, konstituciya insan huqıqları eń joqarı qádiriyat ekenligin ańlatıwshı, erkinliklerin bekkemlewshi hám kepillewshi, sonday-aq, jámiyetlik struktura tiykarların, basqarıw forması hám mámleketlik dúzim tiykarın, olardıń wákillikleri hám óz-ara qatnasıqların belgileytuǵın tiykarǵı hújjet esaplanatuǵınlıǵın óz bayanatlarında keltirip ótti.

Bunnan soń, Qaraqalpaq mámleketlik universiteti 1-kurs tayanısh doktorantı D.Alniyazov hám Yuridika fakulteti 3-kurs studenti X.Akmalovlar sózge shıǵıp, jańa redakciyadaǵı Ózbekstan Respublikası Konstituciyasınıń qabıl etilgenligi bul xalqımızdıń párawanlıǵın jáne de asırıw, insan huqıqları hám máplerin sózsiz támiyinlewde úlken áhmiyetke iye ekenligi atap ótti. Konferenciya qatnasıwshıları ortasında soraw juwap ótkerilip, ózleriniń qızıqtırǵan sorawlarına tiykarlı juwaplar aldı.