Túrkiyanıń Antaliya qalasında qılıshlasıw sportınıń sablya baǵdarı boyınsha jaslar arasında jáhán kuboginiń gezektegi basqıshı ótkerildi.

Onda Ózbekstan saylandı komandası quramında qatnasqan erler arasında Islam Abdazov hám Azizbek Dáwletnazarov, qızlar komandası quramında bolsa, Ayakóz Jumamuratova, Nargiza Jaqsıbaeva hám Berdaq atındaǵı Qaraqalpaq mámleketlik universiteti Dene mádeniyatı fakulteti studenti Gúlistan Perdebaevalar altın medallardı qolǵa kirgiziwge miyasar boldı.

Jáhán kuboginiń finallıq bellesiwlerinde jigitlerimiz Túrkiyanı 45:44, qızlarımız bolsa, italiyalı jaslardı 45:37 esabında jeńip shıǵıwǵa miyasar boldı.

Sonday-aq, jekkelik bellesiwlerinde Ózbekstan saylandı komandası aǵzalarınan Fernanda Errera hám Azizbek Dáwletnazarovlar qola medalın jeńip aldı.

-Qızım Gúlistan bul jarıstıń jekkelik bellesiwlerinde sherek finalǵa shekem jetip bardı,- deydi sportshınıń anası Tamara apa Masharipova.- Sonlıqtan komandalıq bellesiwlerde ol jeńimpaz bolıw ushın óziniń bar kúsh-jigerin jumsadı hám chempionlıqtı qolǵa kirgizdi. Olardıń bul jetiskenlikleri birinshi gezekte, bizlerdi sheksiz quwanıshqa bóledi. Aldaǵı waqıtları komandamız aǵzalarınıń bunday úlken tabıslardı kóbirek qolǵa kirgiziwine shın kewilden tilekleslik bildirip, olardıń Parij-2024 Olimpiadasında elimizdiń bayraǵın joqarılarǵa kóteriwine isenip qalaman. Tabıslar kóz aydın áziz janlarım!

Adilbay Orazov,

Qaraqalpaqstan xabar agentligi sholıwshısı.