Búgin, 26-dekabr kúni Berdaq atındaǵı Qaraqalpaq mámleketlik universiteti janındaǵı akademik Ch.Abdirov atındaǵı mádeniyat sarayında jıl juwmaǵına arnalǵan bayram keshesi hám «UNIVERSITET PIDAYÍSÍ – 2023» sıylıǵınıń saltanatlı tapsırıw máresimi bolıp ótti.
Onda prorektorlar, fakultet dekanları, dekan orınbasarları, professor-oqıtıwshılar hám belsendi student-jaslar qatnastı. Sıylıqlaw máresimin universitet rektorı akademik A.Reymov saltanatlı túrde ashıp berdi hám jıynalǵanlardı bayram menen qutlıqladı.
Bunnan soń, Mámleketimizde alıp barılıp atırǵan keń kólemli reformalardı jaslar arasında keńnen úgit-násiyatlawda hám jámiyetlik jumıslarda belsendilik kórsetip atırǵan, ayrıqsha jetiskenliklerge iye, sonday-aq, universitetimizge óziniń múnásip úlesin qosıp kiyatırǵan, professor-oqıtıwshılar, xızmetkerler hám belsendi student jaslardı sıylıqlaw máresimine náwbet berildi.
Haqıyqatında da Mámleketimizde bilimlendiriw sistemasınıń jaqsılaw onı zaman talapları tiykarında modernizaciyalaw, jaslardı joqarı bilimli, fizikalıq hám ruwxıy bay insan etip tárbiyalaw, student-jaslardı sociallıq qorǵaw sistemasın jetilistiriw, olardıń talantın hám qábiletlerin júzege shıǵarıw, bilimlendiriw mákemeleriniń basshı hám pedagog xızmetkerleriniń abırayın asırıw, olardıń nátiyjeli miynet etiwi ushın zárúr shártsharayatlar jaratıw boyınsha bir qatar jumıslar alıp barılmaqta.
Bunıń ayqın mısalı retinde Berdaq atındaǵı Qaraqalpaq mámleketlik universitetinde házirde 30 mıńǵa jaqın studentler tálim almaqta. Bul studenlermizge 1000 nan aslam professor-oqıtıwshılar tálim berip kelmekte. Sonday-aq, universitetimizde studentler ushın 49 pán dógeregi, 16 sport dógeregi 29 social-mádeniy hám kórkem óner jámi 94 dógerekleri jumıs alıp barmaqta.
Húrmetli Prezidentimizdiń 213-sanlı tariyxıy pármanı boyınsha qaraqalpaqstanlı jaslarǵa kórsetip atırǵan atalarsha ǵamxorlıǵı nátiyjesinde mámleketlik grant tiykarında qosımsha 3 mıń kvota, tólemli-kontrakt tiykarında 6 mıń 500 kvota ajıratıldı. Sonnan 1209 jas grant tiykarında universitetimizde student bolıw baxıtına miyasar boldı.
Sonday-aq, 2022-jıl 7-marttaǵı «Shańaraq hám hayal-qızlardı sistemalı qollap-quwatlawǵa baylanıslı jumıslardı bunnan bılay da jedellestiriw ilajları haqqında»ǵı 87-sanlı Prezident pármanına tiykar 2022/2023 oqıw jılında universitetimizde 412 2023/2024 oqıw jılında 172 hayal-qızlardıń kontrakt pulları mámleket tárepinen tólep berildi.
Sonıń menen birge, Qaraqalpaq mámleketlik universiteti 2024-jıl ushın Aziya universitetleri reytinginde (QS Asia University Rankings 2024) Aziyanıń TOP-1000 lıǵındaǵı eń kúshli joqarı oqıw orınları qatarınan orındı iyeledi. Húrmetli Prezidentimizdiń ilim hám bilimlendiriw tarawına degen joqarı itibarı, tarawdıń materiallıq-texnikalıq bazasın bekkemlew, tálim hám ilim tarawı wákilleriniń izertlew jumısların elede jetilistiriw, taraw xızmetkerlerin sociallıq jaqtan qollap-quwatlawdı kúsheytiw maqsetinde alıp barılıp atırǵan reformaları, álbette, tarawdıń rawajlanıwına, ásirese student jaslarımızǵa keń múmkinshilik jaratpaqta. Sonlıqtanda bunday jaratılǵan imkaniyatlardan student-jaslarımız aqılǵa muwapıq paydalanıp, búgingi kúnde Prezident, Nawayı, Ulıǵbek, Berdaq, I.Yusupov, T.Qayıpbergenov stipendiyaları, Zulfiya atındaǵı mámleketlik sıylıǵı, «Mard oǵlon», «Kelajak bunyodkori» sıylıǵınıń iyeleri, respublikalıq, xalıqaralıq tańlawlardıń jeńimpazları, Jáhán hám Aziya chempionları jetilisip shıqpaqta. Álbette bunday tabıslarǵa eriside, Elimizde bilimlediriw tarawına qaratılǵan úlken itibardıń nátiyjesi bolıp tabıladı.
QMU baspasóz xızmeti
