Studentlerdiń oqıwdan bos waqıtların mazmunlı ótkeriwde muzeylerge sayaxat ayrıqsha orındı iyeleydi. Sebebi, muzeyge sayaxat – tárbiya sabaǵı sıpatında insannıń ruwxıy dúnyasın bayıtadı. Usı maqsette, 9-yanvar kúni Qaraqalpaq mámleketlik universiteti Tariyx fakultetiniń 1-kurs tariyx qánigeligi studentleri fakultet tyutorları B.Esemuratova hám G.Esboganovalardıń basshılıǵında Paytaxtımızdaǵı I.V.Savickiy atındaǵı Qaraqalpaq mámleketlik kórkem óner muzeyi hám Qaraqalpaqstan Respublikası tariyxı hám mádeniyatı mámleketlik muzeylerine sayaxat etti.

Muzeylerge sayaxat dawamında studentler xalqımızdıń ótmishtegi jasaw jaǵdayları, úrp-ádet-dástúrleri, mádeniy turmısı menen baylanıslı bolǵan tariyxıy eksponatlar menen jaqınnan tanıstı. Ásirese, qaraqalpaq hayal-qızlarınıń milliy kiyim-kenshekleri, tutınıw buyımları, kók kóylegi studentlerde ayrıqsha tásir qaldırdı. Sonday-aq, mámleketlik kórkem óner muzeyinde I.V.Savickiydiń múyeshi, onıń muzeydi shólkemlestiriwdegi pidayı miynetleri, qollanǵan buyımları da student jaslarda qızıǵıwshılıq oyattı.

Solay etip, áhmiyetli bes baslamanıń biri bolǵan muzeylerge shólkemlestirilgen bul sayaxat studentlerdiń ómirinde júdá mazmunlı hám este qalarlıqtay iz qaldırdı.

Baxıtgúl Esemuratova,

Qaraqalpaq mámleketlik universiteti

Tariyx fakultetiniń tyutorı