Húrmetli Prezidentimiz tárepinen 2024-jıl Mámleketimizde Jaslar hám biznesti qollap-quwatlaw jılı” dep belgilendi. Usı tiykarda “Ózbekstan – 2030” strategiyasınıń 2024-jılǵa mólsherlengen Mámleketlik baǵdarlama joybarı keń jámiyetshilik dodalawı ushın www.uzbekistan2030.uz saytına jaylastırılıp, joybar usı jıldıń 9-fevral kúnine shekem keń jámiyetshilik hám ekspertlik dodalawlardan ótkeriliwi rejelestirilgen. Usı múnásibet penen, Berdaq atındaǵı Qaraqalpaq mámleketlik universitetinde Mámleketlik baǵdarlama joybarı universitet jámááti arasında dodalandı. Onda Milliy ideya, ruwxıylıq tiykarları hám huqıq tálimi kafedrası docenti J.Sagindikov, Insan huqıqları, mámleketlik huqıq hám basqarıw kafedrası docenti X.Kabulov, Ekonomika fakulteti dekanı docent K.Kudiyarov, Ekologiya hám topıraqtanıw kafedrası docenti A.Kidirbaeva, Sociallıq pánler kafedarsı assistenti A.Orazbaev hám universitet professor-qıtıwshıları, student-jasları qatnastı. Ilajdı universitet Jaslar máseleleri hám ruwxıy-aǵartıwshılıq isleri boyınsha prorektor S.Alawatdinov basqarıp bardı.
Dáslep ilajda sózge shıqqanlar, Párman joybarında belgilengen 5 baǵdar boyınsha 100 maqsetke erisiw ushın 2024-jıldaǵı ámelge asırlatuǵın wazıypalar keń jámiyetshilik wákilleri tárepinen qızǵın dodalanıp atırǵanlıǵı, ásirese bul joybarda joqarı bilimlendiriwge qamtıp alıw dárejesin keńeytiw, joqarı maǵlıwmatlı qánigeler tayarlaw sapasın asırıw; mámleketlik emes hám respublikadaǵı shet el joqarı oqıw orınlarına kúndizgi tálim formasında mámleketlik buyırtpası tiykarında qabılaw parametrlerin asırıw, sonday-aq, mámleketlik emes hám respublikada iskerlik alıp barıp atırǵan shet el joqarı oqıw orınlarında mámleketlik grantları boyınsha kadrlar tayarlawdı 20% asırıw, bunnan tısqarı, joqarı oqıw orınlarında ámeliyatqa baǵdarlanǵan kásiplerge tayarlaw múddetleri hám oqıw -metodikalıq qollanbalardı qayta kórip shıǵıw, tálim programmaların dúnyanıń abıroylı universitetleri úlgisi tiykarında jetilistiriw sıyaqlı bir qansha wazıypalar haqqında student-jaslarǵa keń túrde túsindirip ótti. Bunnan soń, Tariyx fakulteti 1-basqısh magistrantı X.Utemuratova, Qaraqalpaq filologiyası hám jurnalistika fakulteti 4-kurs studenti S.Erkinova, Yuridika fakulteti 2-kurs studenti J.Abdullaevlar “Ózbekstan – 2030” strategiyasınıń 2024-jılǵa mólsherlengen Mámleketlik baǵdarlama joybarı haqqında ózleriniń pikir usınısların bildirdi. Ilajda studen-jaslar ózleriniń qızıqtırǵan sorawlarına juwaplar aldı.
QMU baspasóz xızmeti
