Qaraqalpaq filologiyası hám jurnalistika fakultetinde «Gazetaǵa baǵıshlanǵan ómir» atamasında ilaj bolıp ótti. Onda “Jas jurnalistler” klubı basshısı, filologiya ilimleriniń  kandidatı, docent  Zıyada Qojıqbaeva, Jurnalistika kafedrsı dotsenti D.Bekbawliev, Ózbekstan Jurnalistler Awqamı Qaraqalpaqstan bólimi baslıǵı orınbasarı Dawıtbay Abibullaev, «Jetkinshek» gazetası juwaplı xatkeri Darixa Ubbiniyazova, usı gazeta xabarshısı Jeńisgúl Ibadullaeva, tyutor Mambet Reymov hám 1-kurs jurnalistika baǵdarı studentleri qatnastı.

Dóretiwshilik ushırasıw sheńberinde qatnasıwshılar Qaraqalpaqstanǵa miyneti sińgen jurnalist Darixa Ubbiniyazova 60 jasqa tolıw múnasibeti menen onıń jurnalistlik iskerligi haqqında pikirlesti.

Sózge shıqqanlar «Jetkinshek» gazetasınıń qaraqalpaq jurnalistikasındaǵı áhmiyeti, ornı, balalar jurnalistikasınıń tematikası hám onı tayarlaw processlerinde jurnalist Darixa Ubbiniyazovanıń xızmeti boyınsha aytıp ótti. D.Ubbiniyazova keleshek jas áwladtı ádep-ikramlı, Watanǵa sadıq, Watan tuyǵısı ruwxında tárbiyalawda, olardıń dúnyaǵa jańasha kóz-qarasın qáliplestiriwde, milliy ǵárezsizlik ideyaların sanasına sińdiriwde, talantlı balalardı qollap- quwatlawda, júzege shıǵarıwda ayanbay xızmet etpekte. Ol birqansha jas talant iyeleriniń, jas jurnalistlerdiń súyikli ustazı.

Ushırasıwda student jaslar da belsendi qatnastı, avtordıń publitsistikaları hám gúrrińlerin oqıp berdi, ózlerin qızıqtırǵan sorawlarına juwaplar aldı. Bunday janlı ushırasıwlar jaslardı kásipke baǵdarlawda xızmet etiwine isenip qalamız.

Mambetmurat Reymov

Qaraqalpaq filologiyası hám jurnalistika fakulteti tyutorı