Húrmetli Prezidentimiz óz shıǵıp sóylewinde, “Ilim, bilim tálim hám tárbiya, mánawiyat biz ushın tiykarǵı máselelerdin biri” dep aytıp ótken edi. Haqıyqatında da jaslardıń kámil insan bolıp jetilisiwinde Ilim, bilim tálim hám tárbiya, mánawiyat oǵada áhmiyetli esaplanadı.
Usı tiykarda búgin Berdaq atındaǵı Qaraqalpaq mámleketlik universitetinde bilimlendiriw sapasın arttırıw hám jaslar tálim-tárbiyası máselelerine baǵıshlanǵan májilis bolıp ótti. Onda prorektorlar fakultet dekanları, kafedra baslıqları hám barlıq bólim baslıqları qatnastı.
Májiliste dáslep universitet rektorı A.Reymov shıǵıp sóylep, búgingi kúnde mámleketimiz tárepinen bilimlendiriw tarawınıń basshı hám pedagog xızmetkerleriniń abıroyın kóteriw, olardıń nátiyjeli miynet etiwi ushın zárúr shártsharayatlar jaratılǵanlıǵı, bunday jaratılǵan imkaniyatlardan nátiyjeli paydalanıp, jaslardı joqarı bilimli, fizikalıq hám ruwxıy bay insan etip tárbiyalawda, biz bilimlendiriw taraw wákilleri bar kúsh-jigerimizdi jumsawımız kerek ekenligin ayrıqsha atap ótti.
Bunnan soń, jınayatshılıq hám huqıqbuzarlıqlardıń aldın alıw, student-jaslardıń tártip-intizamı, sabaqlarǵa óz waqtında qatnası, olardı kásipke baǵdarlaw, til úyreniw, bos waqıtların mazmunlı ótkeriw boyınsha juwapkerlerge tapsırmalar berdi. Májilis dawamında ótken jıldıń juwmaqları boyınsha bilimlendiriw sapası boyınsha xalıq aralıq hám milliy reytingdegi kórsetkishlerdi jetilistiriwge baǵdarlanǵan jumıslar sın kózqarastan kórip shıǵıldı. Sonday-aq, professor-oqıtıwshılardıń shet el qánigeleri menen tájiriybe almasıwı, scopus xalıq aralıq ilimiy hám ilimiy-texnikalıq maǵlıwmatlar bazalarınan paydalanbay atırǵanlıǵı haqqında toqtalıp, bul boyınsha anıqlanǵan qáte-kemshiliklerdi saplastırıw boyınsha pikir usınısların bildirdi.
Sonıń menen birge, májiliste joqarı oqıw orınlarına xalıq aralıq reytingke kiriwde qoyılatuǵın talaplar hám KPI yaǵnıy “Eń tiykarǵı nátiyjelilik kórsetkishleri” aldıǵa qoyılǵan maqsetke belgilengen waqıt ishinde qanday dárejede eriskenlikti kórsetip beretuǵın sistema boyınsha professor-oqıtıwshılarǵa túsindirip, aldaǵı isleniwi tiyis bolǵan rejeler belgilenip alındı.
QMU baspasóz xızmeti
