Aldın xabar bergenimizdey, búgin 27-fevral kúni Berdaq atındaǵı Qaraqalpaq mámleketlik universitetinde Ózbekstan Jurnalistler awqamı tárepinen “Ǵalaba xabar quralları hám sociallıq tarmaqlarda jańalıqlardı sáwlelendiriw: búgingi jaǵdayı, usınıs hám pikirler” atamasında aymaqlıq konferenciyası ótkerildi. Onda Qaraqalpaqstandaǵı ǵalaba xabar quralları wákilleri, atap aytqanda, ustaz jurnalistler, televidenie radio, gazeta hám internet jurnalistleri, blogerler, málimleme xızmeti basshıları, sonıń menen birge, Tashkent qalası hám Xorezm wálayatınan kelgen media sisteması hám de jámiyetshilik wákilleri, student-jaslar qatnastı.
Konferenciyanı universitettiń jaslar máseleleri, ruwxıylıq-aǵartıwshılıq isleri boyınsha prorektor S.Alawatdinov alıp bardı. Dáslep Ózbekstan Jurnalistler awqamı baslıǵı w.w.a. X.Salimov Húrmetli Prezidentimiz basshılıǵında Qaraqalpaqstanda xalıqqa qolaylıq jaratıw boyınsha ámelge asırılıp atırǵan keń kólemli jumıslar, mámleketimizde milliy jurnalistikanı rawajlandırıw boyınsha turmısqa engizip atırǵan reformalardıń nátiyjeleri, áyne kúnde tarawdıń wákilleri aldında turǵan aktual wazıypalar haqqında sóz etti.
Bunnan soń, “Social tarmaqlarda dezinformaciya hám misinformaciya máselesi: olarǵa qarsı qanday gúresiw múmkin?”. Bul tema boyınsha “Jańa media tálim orayi” direktorı, filologiya ilimleri doktorı B.Alimov óz shıǵıp sóylewinde aytıp ótti. Konfrenciyada internet jáne de social tarmaqlardan paydalanıw jedel rawajlanıp atırǵan házirgi zamanda dezinformaciya hám misinformaciya máselesi kúnniń baslı temasına aylanǵanlıǵı, olarǵa qarsı nátiyjeli gúresiw jolları haqqında hár tárepleme maǵlıwmatlar berildi.
Konferenciyada “Qoraqalpog‘iston tongi” gazetasi bas redaktorı N.Matyoqubova orınlarda bolıp atırǵan waqıya-qubılıslardı qalıs, ádalatlı sáwlelendiriw, baspasóz hám sóz erkinligi, kásip etikası talaplarına ámel qılıw máseleleri, sóz juwapkershiligi, tarawımız aldında turǵan ámeldegi kemshilikler hám olardıń sheshimleri haqqında sóz etdi.
Erkin sáwbet tárizinde ótken ilajda Qaraqalpaq mámleketlik universitetinen — filologiya ilimleri doktorı, dotsent Z.Kojikbaeva, filologiya ilimleri doktorı, dotsent T.Masharipova, jas jurnalistler klubı aǵzası S.Axmetova, N.Ataǵullaeva hám basqalar óz pikir-usınısların bildirdi.
