Ózbekstan Respublikası Prezidenti Shavkat Mirziyoevtiń 8-mart kúni xalıqaralıq Xayal-qızlar bayramına arnalǵan saltanatlı keshede shıǵıp sóylegen sózin bárshe hayal-qızlarımız sıyaqlı men de úlken qızıǵıwshılıq penen tıńladım. Ásirese, Húrmetli Prezidentimizdiń bolajaq analar, keleshek tárbiyashıları bolǵan qızlarımızdıń joqarı bilim alıwı, zamanagóy kásip óner hám texnologiyalar, sonday-aq, qızlarımızdıń shet tillerin iyelewine úlken áhmiyet qaratıp atırǵanlıǵı haqqında aytıp ótken sózlerinen joqarı oqıw ornında jas qızlarımızdıń tálim-tárbiyası menen shuǵıllanıp atırǵan ustaz sıpatında oǵada tásirlendim. Prezidentimiz hár bir shıǵıp sóylewinde hayal-qızlardı joqarı bilimlendiriwge qamtıp alıw, olardıń ilim menen shuǵıllanıwına úlken imkaniyat jaratıw, ásirese jas qızlarımızdıń oqıp bilim alıw menen birge olardı belgili bir kásipke baǵdarlaw boyınsha da aldımızǵa úlken wazıypalar belgilep bermekte. Biz Joqarı bilimlendiriwde islep atırǵan ustazlar, ásirese student qızlarımızdıń tálim-tárbiyası menen shuǵıllanıp atırǵan hayal-qızlar másláhát keńesi jankúyerleri Prezidentimizdiń bunday sózlerinen ruwxlanıp ele de óz aldımızǵa úlken maqsetler qoyıp student qızlarımız benen hám ilimpaz , alım xayal-qızlar benen alıp barıp atırǵan iygilikli hám sistemalı islerimizdi ele janlandırıwımız tiyis.
Xalqımızda sonday ibara bar: “Mıń márte esitkennen bir márte kórgen jaqsı”degen. Mine, Prezidentimizdiń usı Saltanatlı bayram keshesinde shıǵıp sóylegen sóziniń tikkeley hayal-qızlardıń, tiykarınan jas qızlardıń oqıp bilim alıp joqarı maǵlıwmatlı bolıwı , kásip-óner iyelewi shańaraq baxıtı, perzentler kámalı ushın, sol tiykarda pútkil jámiyet rawajlanıwı ushın xızmet etetuǵınlıǵı haqqında hám de ilimpaz, alım hayal-qızlarǵa qaratılıp atırǵan itibar hám imkaniyatlar, magistratura baǵdarında oqıp atırǵan qızlarımızǵa berilip atırǵan jeńillikler haqqında aytıp ótken sózlerin ózime belgilep aldım hám Xúrmetli Prezidentimizdiń bul sózlerin pikirimniń sońında sizlerdiń názerińizge usınbaqshıman…
Injayım Seytnazarova –
Berdaq atındaǵı Qaraqalpaq mámleketlik universiteti rektorınıń Hayal-qızlar máseleleri boyınsha másláhátshisi
“Qaraqalpaqstan Respublikasına miyneti sińgen jaslap ustazı”
“Mutabar hayal” kókirek nıshanı iyesi.
