Búgin Qaraqalpaq mámleketlik universitetinde Qıtay ilimler akademiyasına qaraslı Sinczyan ekologiya hám geografiya institutı, Suw resursları hám arxitektura injinerligi kolledji, Arqa-Batıs A&F universiteti wákillerinen ibárat delegaciyaları menen ushırasıw shólkemlestirildi. Onda universitet professor-oqıtıwshılar, doktarantlar, student-jaslar qatnastı. Ushırasıwda dáslep universitet rektorı A.Reymov óz prezentaciyası arqalı universitet haqqında aytıp, “Zamanagóy awıl-xojalıǵında suw tejewshi texnologiyalardı paydalanıw” temasında shıǵıp sóyledi. Bunnan soń, Sinczyan ekologiya hám geografiya institutı bas direktorı, professor Chjan Yuanmin hám de professor Tian Chanyan ózleriniń prezentaciyaları arqalı Sinczyan ekologiya hám geografiya institutı sonday-aq, Qıtay ilimler akademiyası haqqında aytıp ótip, Aral teńizi átirapında egiliwi múmkin bolǵan ósimlikler, dárilik ósimlikler, suwdıń duzlılıǵın azaytıw hám topıraqtıń quramın jaqsılaw boyınsha keńnen maǵlıwmatlar berip ótti. Ushırasıwdıń soraw-juwap bóliminde universitettiń professor-oqıtıwshıları, doktorantlar hám student-jaslar ózleriniń qızıqtırǵan sorawlarına tolıq juwaplar aldı.