“Hayal-qızlar hám erler ushın teń huqıq hám de imkaniyatlar kepillikleri haqqında”ǵı Ózbekstan Respublikası Nızamınıń 13-statyasına muwapıq bilimlendiriw sistemasında sonıń ishinde Joqarı oqıw orınlarında 200 ge jaqın hayal-qızlar hám erler ushın teń huqıq hám de imkániyatlardı támiyinlew máseleleri boyınsha másláhát keńesi iskerligi jolǵa qoyılǵan. Búgingi kúnde usı másláhát keńeslerinde 1450 aǵza iskerlik alıp barmaqta.
Bul baǵdarda Oliy Majlis Senatında da bul máselelerge ayrıqsha itibar qaratılıp kelinbekte. Usı jıldıń 13-mart kúni Ózbekstan Respublikası Joqarı bilimlendiriw, ilim hám innovaciyalar ministrligi sistemasındaǵı joqarı oqıw orınlarında eń úlgili iskerlik alıp barıp atırǵan 24 hayal-qızlar máseleleri boyınsha rektor másláhátshileri parlament joqarı palatasına kelip, Senat iskerligi menen tanıstı hám de Senattıń Hayal-qızlar hám gender teńlik máseleleri komiteti baslıǵı Malika Kadirxanova hám Komitette turaqlı tiykarda isleytuǵın senator Gulnora Marufovalar menen ushırasıw bolıp ótti.
Sońǵı jıllarda mámleketimizde hayal-qızlardı hár tárepleme qollap-quwatlaw, olardıń bilim alıwları ushın keń múmkinshilikler jaratıw, kásip-ónerge úyretiw menen birge bándligin támiyinlew, jámiyetimiz turmısındaǵı sociallıq-siyasiy belsendiligin asırıw, túrli tarawlarda óz qábilet hám múmkinshiliklerin ámelge asırıwı ushın shárt-shárayatlar jaratıw wazıypaǵa aylanǵanı, buǵan baylanıslı Komitet tárepinen ámelge asırıp atırǵan jumıslar haqqında maǵlıwmatlar berildi.
Ashıq sáwbetlesiw túrinde ótken ushırasıw dawamında 2024-jılda Gender teńlikke erisiw strategiyasın ámelge asırıw boyınsha kompleks ilajlar baǵdarlamasında belgilengen wazıypalar hám olardı turmısqa engiziwdegi juwapkershilik haqqında da sóz bardı.
Sonıń menen birge, bul Oliy Majlis Senatında ótkerilgen ilajǵa joqarı oqıw orınlarında eń úlgili hám belsendi iskerlik alıp barıp atırǵan bir topar Hayal-qızlar máseleleri boyınsha rektor másláhátshilerine Ózbekstan Respublikası Oliy Majlis Senatı tárepinen «HÚRMET JARLÍǴÍ» tapsırıldı. Bul sıylıqlanǵanlar ishinde Berdaq atındaǵı Qaraqalpaq mámleketlik universiteti hayal-qızlar máseleleri boyınsha rektor másláhátshisi , f.i.k.,docent Injayım Seytnazarova jıl dawamında Keńes iskerligin sistemasılı jolǵa qoyıwdaǵı belsendiligi ushın Ózbekstan Respublikası Oliy Majlis Senatı baslıǵınıń «HÚRMET JARLÍǴÍ»n alıwǵa miyassar boldı.
Óz gezeginde Injayım Seytnazarovanı universitet jámááti atınan shın kewilden qutlıqlaymız hám aldaǵı jumıslarında tabıslar tilep qalamız!
